La crisis provocada pola COVID-19 supunxo un parón na actividá económica n’Asturies y tamién nel llabor de los artistes y creadores asturianos. La Conseyería de Cultura, Política Llingüística y Turismu quixo da-yos visibilidá y dinamizar la cultura nes redes, amás de valorar la aportación qu’esti sector fai a la ciudadanía pa lluchar contra los efectos de la pandemia. Cola coordinación de la Sociedá Pública de Xestión y Promoción Turística y Cultural, entamó la iniciativa Asturias, Cultura en Rede, con una páxina web onde se foron xubiendo los 50 vídeos escoyíos pal proyectu d’ente les 140 propuestes que se presentaron a la convocatoria.

Nos proyectos d’Asturies, Cultura en Rede, qu’incluyen ámbitos como artes escéniques, cine, artes plástiques, lliteratura y música, hai abondos n’asturianu, con audiovisuales de creadores como Leticia González, Rodrigo Cuevas, Ruma Barbero, Alicia Andrés Ramos, Pablo Casanueva, Jaime Santos, Inaciu Galán, Rubén Bada, Milio Ureta, Gonzalo González Barreñada, Alfredo González, Pablo X. Suárez, Nun Tris o Alberto Vázquez García.

La promoción nes redes (Facebook, Twitter y Instagram) de tolos proyectos fíxose tanto n’asturianu como en castellanu.