L'Academia de la Llingua Asturiana creóse por un decretu del añu 1980 (preautonomía), que nun definía’l so estatus xurídicu. Darréu, el 12 d'abril de 1995, el Conseyu de Gobiernu aprobó los sos estatutos actuales, qu’agora s’actualicen con una norma que define con mayor claridá los fines d'esta corporación de derechu públicu y tamién determina la so sede social. 

El decretu nuevu, que va publicase en BOPA d’equí a poco, especifica tamién el procedimientu pal nomamientu de los sos miembros de númberu, d'honor y correspondientes, al tiempu que marca les funciones de los sos órganos: la presidencia, la vicepresidencia la secretaría y la tesorería.