El tema El que conoz a tierra, de Carla Armas y Rubén García, algamó'l Premiu Camaretá al Meyor Cantar, convocáu na so decimotercer edición y que'l xuráu resolvió tres la gala celebrada nel Auditoriu del Centru Niemeyer esti sábadu 27 de payares.

El xuráu del premiu, que busca reconocer a la meyor composición en llingua asturiana o gallego-asturianu difundida nel añu 2020, escoyó na primer fase del certame, celebrada en xunetu, los cuatro cantares finalistes: Tomasín, del grupu ¿Aú?, Flacos y ensin peinar, de la Banda de Gaites Camín de Fierro, Veis volver, del dúu L-R y El que conoz a tierra, de Carla Armas y Rubén García. A lo último, impúnxose el cantar El que conoz a tierra, con lletra en sanabrés, variante zamorana de la llingua asturiana.

La gala, que se retresmitió en directo pela TPA, acoyó les actuaciones de los cuatro finalistes, y darréu, de la que'l xuráu deliberaba, Rodrigo Cuevas ofreció una actuación na qu'incluyó la interpretación de la canción ganadora de la edición pasada, Rambalín. Rodrigo Cuevas foi gallardonáu esta última selmana col Premiu «El Ojo Crítico» de música moderna «por traer al sieglu XXI la tradición y el folclore asturiano».

La dotación del Premiu Camaretá al Meyor Cantar incluye un premiu de 6.000 euros, la realización d'un videuclip, amás de la promoción y difusión de la canción ganadora nos medios de comunicación y n'eventos entamaos o promovíos pol Gobiernu d’Asturies.
 

Información complementaria