La Conseyería de Cultura, Política Llingüística y Turismu impulsa en collaboración cola Residencia Lliteraria 1863 la Beca Asturies, que va sofitar una residencia de creación lliteraria en llingua asturiana o eonaviegu n'A Coruña, realizada por un escritor o escritora ente'l 1 y el 31 d'avientu del 2021. La iniciativa foi presentada pol director xeneral de Política Llingüística, Antón García, y la escritora y promotora de Residencia Lliteraria 1863, Yolanda Castaño.

Los y les autores que se presenten a la convocatoria, en concurrencia competitiva, van poder mandar les sos solicitúes hasta'l 31 d'ochobre al corréu electrónicu 1863coruna@gmail.com. Habrán proponer un proyectu lliterariu con indicación del xéneru escoyíu, sinopsis o tema/es principales, estructura, forma, estilu, tonu, destinatariu y cualquier otru detalle sobre’l plan creativu de la obra.

Los proyectos presentaos van sometese a la valoración d'un comité d'espertos formáu por reconocíos especialistes en cultura asturiana. A la persona que llogre la beca facilítase-y agospedamientu y una dieta de tresporte y mantención, asina como accesu prioritariu a museos, biblioteques, conciertos, teatru, visites guiaes o alcuentros lliterarios. Amás, la iniciativa busca tamién averar el procesu de creación a los llectores, de cuenta que l'escritor o escritora va tener la oportunidá de dar a conocer el so trabayu mientres la estancia nun actu públicu.

Asitiada nel corazón d'A Coruña, les instalaciones de la Residencia Lliteraria 1863 (añu de construcción del edificiu y que marca'l Rexurdimiento de la lliteratura gallega) remocicáronse dafechu pa facilitar la máxima concentración y inspiración nel trabayu lliterariu. La Residencia ta a dos portales d'onde naciere la Real Academia Gallega de la Llingua y a pocos pasos d'onde tamién residieron Emilia Pardo Bazán, Rosalía de Castro o Pablo Picasso.

EQUÍ PUES DESCARGAR LES BASES DE LA BECA «ASTURIES».