El Boletín Oficial del Principáu d’Asturies (BOPA) del 17 de mayu del 2022 publica la convocatoria de 7 premios lliterarios en llingua asturiana, amás del Camaretá al Meyor Cantar. El plazu de presentación d’orixinales o candidatures finaliza'l 16 de xunu. 

Gallardones convocaos:

Xosefa Xovellanos de novela n'asturianu pa obres de tema y estructura llibres que seyan inédites, non premiaes n'otros concursos y tengan una estensión mínima de setenta y cinco páxines a espaciu doble. Esta ye la edición cuarentena tercera.

Xuan M.ª Acebal de poesía n’asturianu pa obres de tema y estructura llibres que seyan inédites, non premiaes n’otros concursos y tengan una estensión mínima de quinientos versos. Esta ye la edición ventésima octava.

Máximo Fuertes Acevedo d'ensayu n'asturianu pa obres de tema y estructura llibres que seyan inédites, non premiaes n'otros concursos y tengan una estensión mínima de cincuenta páxines escrites a espaciu doble. Esta ye la edición ventésima octava.

María Josefa Canellada de Lliteratura Infantil y Xuvenil n'asturianu pa obres de lliteratura infantil o xuvenil —con independencia de que seyan noveles, compilaciones de cuentos, poemarios o obres de teatru— que seyan inédites, non premiaes n’otros concursos y tengan una estensión mínima de doscientos cincuenta versos pa poesía y de trenta páxines a espaciu doble pa los demás xéneros. Esta ye la edición decimoquinta.

Alfonso Iglesias de cómic n'asturianu pa obres d'estilu, tratamientu y tema llibres, que puen abarcar el desenvolvimentu d'una historia sola o un conxuntu d'histories. Pa participar habrá presentase un proyectu inicial con una estensión mínima de quince páxines, y les obres presentaes habrán ser inédites y non premiaes n'otros concursos. La estensión total de la obra habrá tener un mínimu de 50 páxines. Ye la edición decimocuarta.

Florina Alías a la Meyor Traducción al asturianu, que busca distinguir al traductor, traductora o traductores d'obres orixinales escrites en llingua diferente de la castellana o del gallego-asturianu o eonaviegu, de calter lliterariu y non lliterariu, y editaes (en formatu papel o en formatu dixital) y difundíes nel añu 2021. Ye la edición segunda.

Enriqueta González Rubín de Narrativa moza en llingua asturiana, pa  noveles o escoyetes de cuentos, escrites en llingua asturiana, de tema y estructura llibres que seyan inédites, non premiaes n'otros concursos y tengan una estensión mínima de 50 páxines a doble espaciu con un mínimu de 100.000 caracteres Times New Roman o asemeyao, tamañu 12.

Camaretá al Meyor Cantar pa canciones con lletra en llingua asturiana o en gallego-asturianu. Al premiu van poder presentase cantares de cualquier xéneru con lletra y música orixinal y cantares de cualquier xéneru con lletra orixinal sobre melodíes yá existentes. Nun casu y n'otru, editaes y difundíes al públicu a lo llargo del añu 2021 y hasta la fecha de la convocatoria de la edición presente. Cada solista o grupu musical interesáu va poder presentar al premiu un cantar namás. Esta ye la edición decimocuarta.

Información complementaria