La Conseyería de Cultura, Política Llingüística y Turismu, al traviés del programa Asturies, Cultura en Rede, collabora nel patrociniu  de Semando Festi, el primer festival de música moza n'asturianu, organizáu por Musicasturiana.com y Ixuxú Cultura. 

El conciertu va celebrase'l 4 de febreru a les 19.30h, cola actuación de los artistes Alicia Villanueva y Luis Álvarez Pola, dos de los nomes que protagonicen el relevu xeneracional na tonada; Loína, tríu acústicu de folk atlánticu; Algaire, banda de música tradicional fusionada; y Llevólu’l Sumiciu, dúu d’electrónica de raigañu. Son distintos estilos pa reflexar la diversidá sonora de la música asturiana y con una característica común: tener componentes menores de 34 años. Les entraes anticipaes yá tán a la venta en Musicasturiana.com.

Esta cita naz cola filosofía de dar oportunidaes a les y los creadores xóvenes, de manera que toles persones implicaes na so producción son xente mozo con edaes comprendíes ente los 18 y los 34 años. La diseñadora Cecilia Díaz encargóse de la identidá visual del festival y del diseñu de la cartelería; los presentadores del programa radiofónicu Héroes Ensin Nome, Yedra Riesgo y Raúl Alonso, van presentar l’eventu y entrevistar a los artistes enriba l’escenariu; y la fotógrafa avilesina Lucía Garó va facer les semeyes y el videu resume. Tamién destaca esti equipu técnicu y artísticu pol equilibriu ente la presencia d'homes y la de muyeres. 

Nesta iniciativa collaboren tamién entidaes como la Caxa Rural d'Asturies, el Conseyu de la Mocedá del Principáu d’Asturies y el Conseyu la Mocedá d’Uviéu.

 

Información complementaria