Berta Piñán y Luis García Montero, máximos responsables de la Conseyería de Cultura y del Institutu Cervantes firmaron güei, 20 de marzu, un conveniu de collaboración pa fomentar la difusión de la cultura y la llingua asturianes y integrar la llingua asturiana nes actividaes que lleva a cabu l'Institutu Cervantes. L’alcuerdu contempla qu’autores en llingua asturiana participen na programación nacional y internacional del Institutu pa divulgar la realidá plurillingüe d’España y d’Asturies.

La Conseyería de Cultura, Política Llingüística y Turismu va poder intervenir na escoyeta de persones del ámbitu de la cultura y la llingua asturianes pa participar nes actividaes que se programen, teniendo en cuenta factores como ganar dalgún de los premios que convoca’l Gobiernu d’Asturies pa reconocer les meyores obres escrites n’asturianu y eonaviegu.

Pela so parte, l’Institutu Cervantes va poder disponer de los espacios culturales que seyan de titularidá del Principáu d’Asturies y de la Casina de la Traducción de Cadavéu pa realizar toa clas d’actividaes culturales, como esposiciones, alcuentros, talleres, cursos o charles, fomentando lo más posible la participación d’artistes asturianos.

El conveniu quier impulsar proyectos rellacionaos colos fines de dambes instituciones nos ámbitos cultural y académicu. Va tener una vixencia de cuatro años, prorrogables a otros cuatro más, y nun implica la tresferencia de recursos económicos ente los firmantes, nin gastos pa nenguna de les instituciones.

Otra manera, nel actu de firma del conveniu anuncióse qu’Asturies va acoyer la primer vez la Reunión Anual de Directores del Institutu Cervantes, un cumal que va axuntar unos setenta directivos d’esta institución y qu’aveza a inaugurar la Reina Doña Letizia. Va celebrase del 11 al 14 de xunetu n’Uviéu, Xixón y Avilés.

Neses reuniones periódiques, los responsables máximos del Institutu Cervantes n’España y en tolos sos centros repartíos pel mundu estudien la marcha y los retos del organismu que promociona la llingua española y les llingües cooficiales y divulga la cultura de los países hispanofalantes. Son una cita destacada na axenda del organismu del Ministeriu d’Asuntos Esteriores, que pela primer vez va facese nel Principáu d’Asturies. 
 

Información complementaria