La Conseyería de Cultura, Política Llingüística y Turismu, en collaboración cola Rede de Normalización Llingüística nos Conceyos, reparte más d'un millar d’exemplares de llibros n'asturianu y eonaviegu publicaos nos últimos años. Trátase, en bona midida, de los títulos ganadores de los premios lliterarios n'asturianu correspondientes al añu 2020, amás d'otros volúmenes editaos por esta Conseyería o publicaos gracies a les diferentes convocatories d'ayudes.

El destín d'estos exemplares va ser biblioteques municipales y centros escolares onde la Rede de Normalización Llingüística tien implantación. Esto supón que los llibros van llegar a Avilés, Cangas del Narcea, Corvera, Grau, Candamu, Ḷḷena, Llangréu, Mieres y Xixón; amás de les mancomunidaes del Cabu Peñes, Comarca de la Sidra y la Fundación Parque Histórico del Navia. Amás, los exemplares van llegar a 52 biblioteques municipales, 35 centros de primaria y 11 de secundaria.

Ente los títulos destaquen el poemariu Tayu, d’Alejandro Fernández-Osorio (XXVI Premiu «Xuan María Acebal» de Poesía), La curuxa Catuxa, d'Inaciu Galán y Vero Suari (XIII Premiu «María Josefa Canellada» de Lliteratura infantil y xuvenil), El fervinchu, de Sidoro Villa (XLI Premiu «Xosefa Xovellanos» de Novela), Hai una llinia trazada, de Xune Elipe (XXVI Premiu «Máximo Fuertes Acevedo» d'Ensayu) y los cómics Seltegu, de Ruma Barbero, y El sol na escombrera, d'Alberto Vázquez (XI y XII Premiu «Alfonso Iglesias» de Cómic). Tamién se reparte l'antoloxía Al aveiro d’un trabatel: úa escoyeta de poesía contemporánea en gallego-asturiano, editada pola propia conseyería l'añu pasáu.

Otra manera, tamién empieza a repartise la reedición ampliada de la obra La familia Castañón, xente llano de Xixón, d'Ígor Medio, publicación onde se recueye tol material rellacionao coles tires cómiques tan populares del autor al que se va dedicar anguaño la Selmana de les Lletres Asturianes. Los editores d'esta obra punxeron a disposición de la Conseyería de Cultura, Política Llingüística y Turismu exemplares pa que s'entreguen de baldre a biblioteques y centros escolares.