La Conseyería d’Educación, la Conseyería de Cultura, Política Llinguística y Turismu y RTPA presenten, nel marcu de la 43 Selmana de les Lletres Asturianes, l’adaptación televisiva de la obra de teatru “Hansel y Gretel”, producida pola radiotelevisión pública. Amás, ponse a disposición de la ciudadanía, y sobre manera, de la comunidá educativa, la primer guía d’alfabetización audiovisual d’una obra n’Asturies. La guía tien dos versiones: una en formatu testu y otra en formatu interactivu

Na so versión teatral, "Hansel y Gretel”, de la compañía xixonesa Higiénico Papel Teatro, algamó’l Premiu Nel Amaro na so segunda edición. El xuráu emponderó la sensibilidá, l’humor y l’inxeniu d’esta adaptación del cuentu clásicu, «onde se mecen los personaxes del cuentu colos de la obra y los intérpretes, nun xuegu metateatral cenciellu y brillante».

La versión audiovisual, escrita y dirixida por Laura Iglesia y realizada pola productora Cuatro Gotes, tien como protagonistes a Félix Corcuera, Carlos Dávila y la mesma Laura Iglesia, qu'interpreten a trés primos que vuelven a atopase nel sobráu de la casa de los güelos. Ellí entamen un viaxe peles páxines del cuentu, reviviendo esta historia tan famosa que los hermanos Grimm publicaron en 1812. 


L’actu de“presentación de l’adaptación y la Guía d’alfabetización audiovisual va facese el xueves 5 de mayu a les 10:30 nel IES Astures (Llugones), col alumnáu de 1.u y 2.u de la ESO. L'’estrenu en televisión va ser el sábadu 7 de mayu a les 10 de la mañana.

Amás, tanto'l llargumetraxe como'l "making off" tán disponibles online nesta dirección web:  https://www.rtpa.es/emision-hansel-gretel

Accesos a la Guía d'alfabetización audiovisual y propuesta didáutica: 

Accesu online a la guía interactiva

Descarga de la versión PDF