El Conseyu de Gobiernu aprobó la toponimia oficial del conceyu de Pravia, depués de que'l Conceyu validara'l dictame emitíu pola Xunta Asesora de Toponimia. En publicándose’l decretu correspondiente nel Boletín Oficial del Principáu d'Asturies, les alministraciones públiques van adaptar nos mapes y planos oficiales, y gradualmente nes señalizaciones, les formes toponímiques establecíes nel decretu.

Per otra parte, en cumplimientu de la Llei 1/98 d'Usu y Promoción del Bable asturianu, el pasáu mes de xunetu la Xunta Asesora de Toponimia emitió'l so dictame para la oficialización de los topónimos de los 78 conceyos d'Asturies. En más de la metá de los nomes, concretamente en 40, la denominación actual yá ta n'asturianu o en gallego-asturianu, polo que falta que se revise y apruebe el nome de los 38 restantes.

Nos próximos díes la Conseyería de Cultura, Política Llingüística y Turismu va unviar una comunicación a cada conceyu del entamu del espediente de revisión del nome del conceyu cola propuesta de la Xunta Asesora de Toponimia a cada corporación pueda aprobalu en plenu. La oficialización completa de la toponimia tradicional d'Asturies va facilitar la so aplicación práctica per parte de les alministraciones y de los particulares.

La Xunta Asesora de Toponimia ocupóse, hasta la fecha, d'emitir dictame sobre los nomes tradicionales de los 78 conceyos, de les sos capitales, les sos parroquies rurales y los núcleos de población. Pela so parte, el Conseyu de Gobiernu yá aprobó la oficialización d'estos nomes pa 68 conceyos, depués de que los respectivos conceyos dieren el vistu bonu a los dictames correspondientes.