El Gobiernu d'Asturies avera l'asturianu a los más mozos al traviés de la cultura y l'ociu en #SerondaMoza, una cita nueva que va ofrecer el sábadu 26 en Llanera un programa d'actividaes gratuites empobinaes al públicu d'ente 16 y 35 años.

La Conseyería de Cultura, Política Llingüística y Turismu suma un recursu nuevu p’averar la llingua asturiana al públicu más mozo. «Seronda Moza» naz como una cita n’asturianu onde los más xóvenes pueden atopar una ufierta cultural y d’ociu n’asturianu y gratuita. La primer edición de «Seronda Moza» va celebrase esti sábadu 26 de payares nel IES de Posada, en Llanera.

El programa d’actividaes, diseñáu dende la Dirección Xeneral de Política Llingüística, va ufiertar a lo llargo de tola xornada un mercáu cultural y d’asociaciones onde van participar empreses y entidaes que desenvuelven la so actividá n’asturianu. Amás, van facese dellos talleres y la ufierta musical va incluyir una jam session coral p’adaptar dos temes tradicionales n’asturianu y un conciertu del grupu Llevólu'l Sumiciu.

Tola programación ye de baldre, pero la participación nos talleres precisa la inscripción previa nel corréu electrónicu serondamoza@gmail.com. Nun ye menester cuntar con conocimientos d’asturianu pa participar en cualquiera de les actividaes que se van llevar a cabu.

El programa de talleres previstos a lo llargo de la mañana va tratar asuntos tan variaos como la cocina, l’actividá física, la creación de complementos, la composición d’un rap o la ellaboración d’un cosplay al traviés del reciclaxe de dellos elementos.

#SerondaMoza faise dende la Conseyería de Cultura, Política Llingüística y Turismu cola collaboración del Conceyu de Llanera, la Conseyería d'Educación y l'Ies Llanera.

Consulta'l programa equí

Inscríbite nes actividaes equí. 

 

Información complementaria