La decimoquinta edición del Premiu «Alfonso Iglesias» de Cómic n'asturianu reconoció anguaño'l trabayu de Xon de la Campa Valdés (Xixón, 1973) Misteriu nel soterrañu, que narra les andances del inspector Hevia nel París d’últimos del sieglu XIX. El xuráu del gallardón destacó «la corrección llingüística y la naturalidá de la llingua escrita que nun suel ser fácil de consiguir nesta modalidá lliteraria» y que sí llogra esta historia resuelta en llinia clara.

El xuráu d’esta edición tuvo presidíu pol director xeneral de Política Llingüística, Antón García, y integráu pola filóloga Claudia Elena Menéndez y la llibrera especializada en cómic María Fente. Actuó como secretaria Lourdes Álvarez, filóloga de la Dirección Xeneral de Política Llingüística.

Xon de la Campa Valdés ye ilustrador diplomáu en Grabáu y Técniques d'Estampación pola Escuela d'Arte d'Uviéu. Ente los sos trabayos cúntense ilustraciones y portaes de llibros, cómics y tires en publicaciones periódiques como La Información del Bajo Nalón o La Voz del Trubia. El dibuxante xixonés ilustró y creó les portaes de títulos tan variaos como La Celestina, Drácula, Conan el Bárbaru, El gran llibru de la Mitoloxía asturiana, 1809. Cartes de la revolución de Trubia o Llazarín de Tormes.

El Premiu «Alfonso Iglesias», convocáu pola Conseyería de Cultura, Política Llingüística y Turismu, ta dotáu con 6.000 euros y la publicación de la obra ganadora. Pueden concurrir obres inédites y non premiaes n'otros concursos d'estilu, tratamientu y tema llibre, pudiendo adoptar el desenvolvimientu d'una historia única o un conxuntu d'histories, con una estensión mínima de cincuenta páxines, anque pa participar yera abondo con presentar un proyectu primeru con una estensión mínima de quince páxines.
 

Información complementaria