El Gobiernu d'Asturies empezó la tramitación pa crear la Oficina de Derechos Llingüísticos, una unidá alministrativa que va centralizar la xestión de toles quexes, suxerencies o solicitúes d'información o d'asesoramientu presentaes pola ciudadanía énte l'alministración asturiana en materia llingüística. D'esta miente quier evitase la dispersión existente hasta agora y tamién l'usu de calces informales que dificulten dar una respuesta afayadiza a les demandes ciudadanes.

La conseyera de Cultura, Política Llingüística y Turismu, Berta Piñán, avanzó mientra la celebración del 25 aniversariu de la Fiesta de la Oficialidá de la llingua asturiana, que se llevó alantre'l 2 de xunetu en  Bimenes, que s'abrió'l procedimientu pa l'aprobación del decretu que va regular la creación y funcionamientu del órganu nuevu, que ta incluyíu nel Plan Normativu de l'Alministración del Principáu d'Asturies pal 2022.

La creación de la Oficina de Derechos Llingüísticos supón un pasu más p'amparar el cumplimientu de la Llei d'Usu y Promoción del asturianu y un recursu pa la normalización del usu de la llingua asturiana nel ámbitu de l'alministración pública.

La Oficina de Derechos Llingüísticos, que nun va tener calter sancionador, representa un recursu nuevu pa garantizar los derechos contemplaos na Llei 1/1998, d'Usu y Promoción del Bable/Asturianu. L'organismu va cuntar col personal cualificao de la Dirección Xeneral de Política Llingüística, con conocimientu abondo de llingua asturiana y de la normativa reguladora d'esta materia. D'esta miente, va poder dase calce y respuesta apropiaos a les solicitúes recibíes garantizando la protección de los derechos qu'establez la normativa vixente.

Dende la oficina va facilitase a la ciudadanía qu'asina lo rica tola información necesaria pa poder exercer dafechamente los derechos llingüísticos que-y confier el nuestru ordenamientu, aplicables tanto a los falantes d'asturianu como d'eonaviegu.

Con calter anual, la Oficina va ellaborar una memoria que contenga'l númberu y la naturaleza de les quexes, suxerencies y solicitúes d'información o d'asesoramientu recibíos, y les actuaciones realizaes pa caún de los casos.
 

Información complementaria