La conseyera de Cultura, Política Llingüística y Turismu, Berta Piñán, presidió esti xueves 30 de xunu la reunión constitutiva de la Rede de Normalización Llingüística del Principáu d’Asturies, a la qu’asistieron representantes de 21 conceyos asturianos que disponen de Serviciu de Normalización Llingüística, y de la Universidá d’Uviéu, que tamién lu tien. L’oxetivu que persigue l’organismu nuevu ye reforzar la coordinación ente l’alministración rexonal y los conceyos pa promover l’usu institucional y públicu del asturianu y del eonaviegu nel so territoriu.

La primer reunión de la Rede valió pa constituyila formalmente y ufiertar información sobre les actividaes desenvueltes polos servicios de normalización llingüística a lo llargo d’esta llexislatura y sobre la clas de collaboración que se pue establecer ente’l Principáu y la Rede.

La Rede de Normalización supón l’instrumentu llegal necesariu pa canalizar oficialmente la collaboración qu’ordinariamente caltién l’alministración rexonal colos conceyos n’asuntos llingüísticos. L’órganu  ta llamáu a desempeñar un papel fundamental na regulación territorial de la política llingüística, na creación de servicios normalizadores nuevos, nel caltenimientu de los que yá tán funcionando y na coordinación y desenvolvimientu de l’actividá de toos ellos. 

Cuasi la metá de los conceyos asturianos disponen agora mesmo d’unidaes alministratives que s’ocupen de la normalización de les llingües y dan serviciu a más de la metá de la población del Principáu, en dellos casos con servicios propios y n’otros, mancomunaos con más conceyos.

La regulación de la Rede de Normalización Llingüística representa un pasu más nel compromisu del Gobiernu d’Asturies por dinamizar l’impulsu y la recuperación del nuestru patrimoniu llingüísticu. La collaboración colos conceyos asturianos demostró que la xestión averada a la ciudadanía que desenvuelven los servicios de normalización supón una ferramienta eficaz pa llograr la promoción del usu del asturianu y l’eonaviegu. 

La estructura de la Rede Normalización Llingüística articúlase nun Conseyu de la Rede que va tener una presidencia y vicepresidencia que van ocupar, respectivamente, les persones responsables de la conseyería y de la dirección xeneral con competencies en materia de política llingüística y un númberu illimitáu de vocalíes que van dexar cuntar con representantes de cada alministración pública o entidá que s’adhiera a la Rede. Nun van recibir retribución nenguna pola so participación. 

Ta prevista la creación d’una Comisión Técnica constituyida por personal técnico de los respectivos Servicios y de l’Alministración del Principáu; a esta comisión correspuénde-y realizar estudios, proyectos, actividaes, programes, planes y propuestes en materia de política llingüística, pudiendo formar los grupos de trabayu que considere necesarios.

Información complementaria