La Conseyería de Cultura, Política Llingüística y Turismu editó Derechu llingüísticu del Principáu d'Asturies. Normativa y xurisprudencia, el primer compendiu xurídicu qu'axunta tola llexislación y xurisprudencia de los últimos 40 años tocante a la llingua asturiana y l'eonaviegu. 

El trabayu ye obra del abogáu Nicolás Bartolomé Pérez y busca poner nes manes de la sociedá asturiana, los operadores xurídicos y les alministraciones públiques un manual de consulta sobre'l derechu llingüísticu asturianu hasta'l momentu. 

El llibru estructúrase en cuatro grandes apartaos. Hai una primer sección onde s'analiza la evolución del réxime xurídicu de les llingües propies d'Asturies. Depués recuéyese una compilación de normes de rangu nacional, autonómicu y local aplicables al asturianu y al eonaviegu. 

Tamién s'atopa una recopilación de tola xurisprudencia existente emanada del Tribunal Constitucional y el Tribunal Superior de Xusticia d’Asturies y una partida d'anexos qu'incluyen documentación de tipoloxía variada como resoluciones alministratives, planes de normalización, informes, convenios, etc. A lo último, la obra complétase con una bibliografía estensa de referencia y consulta sobre la materia.

Descarga del llibru Derechu llingüísticu del Principáu d’Asturies. Normativa y xurisprudencia.
 

Información complementaria