El Principáu dispón pela primer vez d'un espaciu propiu na Feria de Fráncfort, l'escaparate européu principal pal sector editorial. La Conseyería de Cultura, Política Llingüística y Turismu pon a disposición del Gremiu d'Editores Asturianos y de les editoriales de la comunidá un estand que va proporcionar a los profesionales del sector y un espaciu de negociu onde desenvolver les sos actividaes na feria coles máximes facilidaes.

Una decena d'editoriales asturianes y el Serviciu de Publicaciones de la Universidá d'Uviéu tán representaes na feria. L'espaciu del Principáu tien obres de delles editoriales y autores tanto en castellanu como en llingua asturiana. Amás, van tar en Fráncfort dos escritores asturianos: Paco Álvarez y Xuan Bello, gracies al sofitu del Gobiernu d'Asturies y del Ministeriu de Cultura y Deporte, respectivamente. 

España ye'l país convidáu d'honor na edición d'esti añu. D'esta manera, Acción Cultural Española va desenvolver un programa lliterariu potente en formatu híbridu, baxo l'eslogan #CreatividadDesbordante. Cuasi 200 participantes, ente los que va haber escritores, traductores, ilustradores, editores, axentes lliterarios, llibreros y distribuidores, participen nesta feria, onde se muestra'l compromisu col sector n'España, la riqueza del plurillingüismu y la diversidá d'autores, xéneros y editoriales del sector.
 

Información complementaria