La Conseyería de Cultura, Política Llingüística y Turismu y la Federación Asturiana de Conceyos ponen en marcha Falamos, un plan nuevu d'enseñanza non reglada p'adultos que quieran adquirir conocimientos básicos de llingua asturiana y eonaviegu.

Esta iniciativa, ufiertada al traviés de los conceyos asturianos, incluye cursos gratuitos y semipresenciales p'adquirir nociones básiques que dexen mandase del asturianu o del eonaviegu en situaciones cotidianes. La iniciativa empezó yá a ufiertar cursos en dellos conceyos asturianos y la respuesta foi bien positiva, con más de 400 preinscritos nes primeres selmanes.

El desenvolvimientu del plan Falamos va cuntar con una inversión de 86.000 euros por parte de la Conseyería de Cultura, Política Llingüística y Turismu, y la FACC va ser la encargada de coordinar el programa nos conceyos asturianos. Los cursos gratuitos van impartise a lo llargo del últimu trimestre d'anguaño con una programación en modalidá dual de 42 hores de duración, repartíes en 22 hores de sesiones on line y 20 hores en cinco sesiones presenciales.

Los temarios de Falamos iguáronse con una estructura cenciella y dinámica y incluyen aspectos vinculaos al vocabulariu y la gramática de dambes llingües pa poder remanalos en situaciones de caldía. Términos y estructures rellacionaes col ámbitu personal y corporal, emocional y familiar; casa, pueblu y ciudá; comerciu y alimentación; trabayu y tiempu llibre. Tamién incluyen recursos llingüísticos sobre entornos naturales, viaxes, multiculturalidá, internet y medios de comunicación.

De momentu, programáronse cursos en trece conceyos asturianos. La ufierta va dir aumentando de la que vaigan confirmándose sedes nueves y a tenor de la demanda existente. Toles persones que quieran pueden formalizar la preinscripción nel enllaz https://cutt.ly/7VbJGoJ.