El Gobiernu d'Asturies sigue cola tramitación pa crear la Oficina de Derechos Llingüísticos, una unidá alministrativa que va centralizar la xestión de toles quexes, suxerencies o solicitúes d'información o d'asesoramientu presentaes pola ciudadanía énte l'Alministración asturiana en materia llingüística. D'esta miente quier evitase la dispersión existente hasta agora y tamién l'usu de calces informales que dificulten dar una respuesta afayadiza a les demandes ciudadanes.

El Boletín Oficial del Principáu d’Asturies de fecha 28 d’ochobre anuncia l'apertura del plazu d'información pública del decretu pol que se crea la Oficina de Derechos Llingüísticos. D'esta manera, el testu propuestu y la documentación de lo que consta l'espediente hasta la fecha pueden descargase dende l'apartáu «Iniciativas-Audiencias e informaciones públicas» del portal web www.asturiasparticipa.es, abriéndose un plazu de 20 díes hábiles pa que puedan presentase alegaciones.

La creación de la Oficina de Derechos Llingüísticos supón un pasu más p'amparar el cumplimientu de la Llei d'Usu y Promoción del Asturianu y un recursu pa la normalización del usu de la llingua asturiana nel ámbitu de l'Alministración pública.
 

Información complementaria