La conseyera de Cultura, Política Llingüística y Turismu, Berta Piñán, presidió'l sábadu 23 d'abril la gala d'entrega de los ocho premios lliterarios concedíos nel 2021 pol Gobiernu asturianu; una convocatoria enmarcada na política de promoción de la llingua asturiana como vehículu d'espresión lliteraria y artística. L'actu fíxose na sala chill out de Llaboral Centru d'Arte, en Xixón, y cuntó cola actuación del grupu Baxel.

La gala d'entrega de los premios lliterarios n'asturianu reconoció a los autores premiaos nes convocatories de la Dirección Xeneral de Política Llingüística a lo llargo del 2021. L'añu pasáu impulsáronse dos categoríes nueves pa reconocer la meyor obra de narrativa moza, al traviés del Premiu «Enriqueta González Rubín», y la meyor traducción al asturianu col Premiu «Florina Alías». Eses dos disciplines súmense a los gallardones de poesía, lliteratura infantil y xuvenil, ensayu, teatru profesional, cómic y novela. 

La nómina de premiaos abrióla la obra Boliescritu de primavera, de Xilberto Llano Caelles, gallardonáu col Premiu «María Josefa Canellada» de Lliteratura Infantil y Xuvenil n'asturianu, na so decimocuarta edición. El xuráu destacó del trabayu «el tratamientu del tema del confinamientu del 2020 dende una perspectiva orixinal y ensin cayer en llugares comunes», amás de la so «alta calidá lliteraria y el bon usu de la llingua». Tamién resalta «el nivel xeneral de calidá de les obres presentaes y la diversidá de perspectives que traten».

Pela primer vez, nel 2021 convocóse'l Premiu «Florina Alías» a la Meyor Traducción al asturianu. La traducción de La Biblia al asturianu, editada pola Sociedá Bíblica, foi la obra ganadora nesta primer edición, que se falló na inauguración de la Casina de la Traducción, na casa natal del escritor Fernán Coronas en Cadavéu; el xuráu destacó'l «aparatu filolóxicu desenvueltu pa traducir dende les llingües orixinales, el trabayu escomanáu lleváu a cabu a lo llargo de más de 30 años y la complexidá del mesmu».

El filólogu Ramón d'Andrés foi distinguíu cola ventésima séptima edición del Premiu «Máximo Fuertes Acevedo» d'Ensayu en llingua asturiana pola so obra Una ciencia sin enfotu, un títulu que'l xuráu valoró como «un manual básicu p'abrir los güeyos de cualquiera, filólogu o non, sobre la ciencia y la non-ciencia que consumimos, asimilamos y creyemos al falar de llingües nel día a día».

La obra La cafiante muerte de Nicolai Bostov, del escritor José Ángel Gayol, foi la ganadora de la 42 edición del Premiu «Xosefa Xovellanos» de Novela n'asturianu. «Una sátira social con un ritmu narrativu bien llográu que retrata la sociedá asturiana de finales del sieglu XX con humor esperpéntico, y too ello espresao con un rexistru llingüísticu de muncha calidá y naturalidá», en palabres del xuráu.

El Premiu «Xuan María Acebal» de Poesía n'asturianu recayó anguaño nel poemariu Cantar de ti mesma, de Pablo Texón Castañón, una obra onde, a xuiciu del xuráu, hai que valorar la so intencionalidá de cantu, al romper colos estereotipos de les elexíes y los cantos de duelu. La voz de celebración que lu percuerre atrévese a combinar diferentes opciones formales en poemes a lo llargo del testu.

L'ilustrador y escritor Ángel de la Calle llevó'l Premiu «Alfonso Iglesias» de Cómic n'asturianu na so decimotercer edición pola so obra Paez que nun foi ayeri. Ye un trabayu que según el xuráu merez el gallardón por «la  madurez y l'equilibriu que presenta, la intriga que crea la historia, les referencies metalliteraries al mundu del cómic, la fidelidá y l'interés históricu, amás de la calidá llingüística del trabayu».

La propuesta contemporánea de Teatru Nun Tris La reina de la guapura de Leenane fíxose cola última edición del Premiu «Nel Amaro» de Teatru Profesional n'asturianu. Una pieza que'l xuráu valoró pol retratu que fai de la problemática irlandesa de la emigración, el conflictu llingüísticu y d'identidá.

A lo último, estrénase igualmente'l Premiu «Enriqueta González Rubín» de Narrativa Moza, pa menores de trenta y ún años, que premia nesta ocasión la novela No que cinca los seres de lleenda, de Blanca Fernández Quintana. La obra, de temática clásica y inspirada na mitoloxía asturiana, «abre un camín novedosu na narrativa asturiana actual», según el xuráu.

La Conseyería de Cultura, Política Llingüística y Turismu convoca tamién el Premiu «Camaretá» al Meyor Cantar, que na edición del 2021 ganaron Carla Armas y Rubén García, pero esti gallardón entregóse yá nel trescursu de la gala onde se dio a conocer el fallu del xuráu.
 

Información complementaria