Entréguense los premios del concursu escolar Al son del cantar nuna gala con nueve actuaciones musicales
30/05/2022
El Principáu y la Rede de Normalización Llingüística apurrieron el vienres 27 de mayu nel Centru Cultural Valey de Piedrasblancas (Castrillón) los galardones del concursu escolar Al son del cantar, una iniciativa pa premiar los cantares compuestos en llingua asturiana o eonaviegu pol alumnáu.
La gala consistió na interpretación en directo de los temes ganadores por parte d'artistes como Pop Piquiñín, Toli Morilla, Calea, Tringuilintainas, Llevólu’l Sumiciu, Alfredo González, Bacotexo, Dani Stylo y La Bonturné, d'estilos musicales tan variaos como'l pop-rock, el folk, la música d'autor, el rap y la electrónica. La gala foi grabada pola Televisión del Principáu d'Asturies pa la so emisión posterior.
El concursu Al son del cantar tien como oxetivu animar al alumnáu a presentar un cantar con lletra n'asturianu o gallego-asturianu (eonaviego) escrita por ellos mesmos sobre una melodía tamién orixinal o sobre una melodía tradicional. Trátase d'un vía p’aguiyar l'aprendimientu significativu del alumnáu al traviés de la investigación y la creatividá.
Los alumnos y alumnes premiaos pertenecen a los centros CRA L.lena, CP Ramón de Campoamor (Xixón), IES Cangas del Narcea, CP Salvador de Vega Berros (Sariegu), CP Darío Freán Barreira (Cuaña), CRA Cabu Peñes (Gozón), CP San Félix (Carreño), CPEB El Salvador (Grandas de Salime), IES Peñamayor (Nava) y CP Virxe del Fresnu (Grau). A la gala asistieron autoridaes como Antón García, director xeneral de Política Llingüística, David Artime, director xeneral d'Ordenación, Evaluación y Equidá educativa; l'alcaldesa de Castrillón Yasmina Triguero y la conceyala d’esti Conceyu María del Mar Gonzalez.
El premiu consistió na entrega d'exemplares del discu que recueye los cantares ganadores, que ta disponible tamién nes plataformes dixitales más habituales: Youtube, Spotify y Apple Music, amás d'otres.