L'espectáculu Les madreñes vacíes, de Carlos Alba, ye'l ganador del VI Premiu «Nel Amaro» de Teatru profesional n'asturianu 2022. El xuráu destacó «el bon trabayu actoral, la interacción que consigue col públicu, la integración d'oxetos y títeres y l'usu d'una referencia lliteraria universal como Miguel Hernández p'ampliar el repertoriu teatral asturianu». 

L'actor y monologuista Carlos Alba da vida al so testu, una fábula basada nun poema de Miguel Hernández y cuntada por un xuglar qu'entemez los títeres, la música y la palabra poética dientro del montaxe. Ye la segunda ocasión en que'l trabayu d'Alba se reconoz col Premiu «Nel Amaro», yá que nel 2017 recibió esti gallardón pola so adaptación Llázaro de Tormes.

Les madreñes vacíes llegó a la final del Nel Amaro xunto a les producciones Con M mayúscula (Kamante Teatro), La sierva patrona (Producciones Nun Tris) y Aventurina l'ablana (Factoría Norte). Tolos espectáculos finalistes representáronse a lo llargo del mes d'ochobre nel Teatru Filarmónica d'Uviéu nel Festival de Teatru Nel Amaro.

El gallardón, promovíu pola Conseyería de Cultura, Política Llingüística y Turismu, tien por oxetu consolidar, arriquecer y prestixar l'asturianu y l'eonaviegu nel ámbitu del arte dramáticu, y ta dotáu con 6.000 euros.

El premiu y festival lleva'l nome de Nel Amaro, autor a quien se dedicó nel 2021 la 42 Selmana de les Lletres Asturianes y qu’a últimos de la década de los setenta del sieglu pasáu abrió'l camín pa la vanguardia teatral n'asturianu. Ente les sos obres de teatru destaquen Xénesis o alborá de la concencia (1978); Glayíos nueos, vieya murnia (1979); L'únicu rebalbu (1980) y Antígona, por exemplu, que ganó'l Premiu de teatru de l'Academia de la Llingua Asturiana en 1991. Les manes en caxón (2003) foi la so última publicación teatral. 
 

Información complementaria