L'Institutu Xeográficu Nacional (IXN), dependiente del Ministeriu de Tresportes, Movilidá y Axenda Urbana, dio la razón al Gobiernu del Principáu d’Asturies al respective del reconocimientu d'oficialidá y usu del topónimu Ría del Eo. La resolución de 15 de payares, que l'IXN acaba de comunicar a l'Alministración asturiana, da-y al topónimu Ría del Eo'l calter de nome alternativu, esto ye, col mesmu nivel d'oficialidá y usu que Ría de Ribadeo.

El dictame del IXN pon fin al llargu debate manteníu sobre la denominación de la desembocadura d'El Río Eo. Na práctica, la decisión del IXN va suponer la inclusión de dambos topónimos en toles bases de datos xeográfiques y cartográfiques producíes poles Alministraciones Públiques integraes nel Sistema Cartográficu Nacional.

L'Institutu Xeográficu Nacional yá se pronunciara nos mesmos términos al respective del topónimu Ría del Eo a finales del 2021, pero la resolución anulóse pola estimación parcial de les alegaciones que aludíen a vicios nel procedimientu y solicitóse la emisión d'un informe nuevu. 

La resolución del IXN señala que se constata que la denominación Ría del Eo úsase mayoritariamente nos territorios de la marxe asturiana del ríu homónimu, amás de recoyese con un nivel d'usu asemeyáu a Ría de Ribadeo en cartografía y otros documentos polo menos dende'l sieglu XIX hasta anguaño.