La Conseyería de Cultura, Política Llingüística y Turismu anunció que la próxima Selmana de les Lletres Asturianes (43 edición, añu 2022) va rindir homenaxe al dibuxante, guionista de cómic y músicu Ígor Medio. L'artista xixonés, fináu nun accidente de carretera nel 2006, cumpliría los 50 años nel 2022.

L’anunciu fízolu la conseyera Berta Piñán na so intervención na apertura de la Selmana de les Lletres de Cangas, onde participó xunto al alcalde del conceyu, José Víctor Rodríguez. La conseyera de Cultura adelantó tamién que'l programa de la próxima edición de la Selmana de les Lletres va xirar alredor de les actividaes artístiques nes que destacó con brillantez y éxitu Ígor Medio: el cómic y la música.

Ígor Medio (1972-2006) realizó cola so estensa obra una contribución esencial al cómic n'Asturies, creando mundos qu'inda perviven nel imaxinariu colectivu, ente los que destaca la Familia Castañón. La Selmana de les Lletres Asturianes va xirar alredor del creador xixonés, y van tener especial protagonismu na so programación el cómic y la música.

Esta va ser la primer vegada que la Selmana se celebre alredor d’un autor d'esti xéneru, amás de ser la primer vez qu’una persona nacida na década de los 70 del sieglu pasáu reciba l'homenaxe de les Lletres Asturianes.