El proyectu Al son del cantar presentóse esti martes 5 d'ochobre al traviés de la web Educastur, de la Conseyería d'Educación. Trátase d’una propuesta que parte de la Rede de Normalización Llingüística a los centros educativos de primaria y secundaria de los conceyos d'Avilés, Candamu, Cangas del Narcea, Castrillón, Corvera, Grau, Samartín del Rei Aurelio, Ḷḷena, Xixón y a los de les mancomunidaes de la Comarca de la Sidra, Comarca Ozcos-Eo, Cabu Peñes y Parque Históricu del Navia. La Conseyería de Cultura, Política Llingüística y Turismu collabora nel proyectu faciéndose cargu de la producción del discu y de la gala onde se van interpretar los cantares ganadores en directo y que se va facer nel añu 2022.

Esti proyectu preséntase en forma de concursu musical pa los cursos de 4.u, 5.u y 6.u de Primaria y 1.u y 2.u d'ESO, y quier estimular l'aprendimientu significativu del alumnáu al traviés de la investigación, el descubrimientu y la creatividá nel campu de la música. L’oxetivu ye que l'alumnáu presente un cantar con lletra n'asturianu o gallego-asturianu escritu por ellos mesmos, sobre una melodía tradicional o sobre una melodía tamién orixinal y propia. Un xuráu va facer la selección de los cantares ganadores, que van ser versionaos por grupos profesionales de la música asturiana. 

Esti concursu, que yá se celebró nuna edición anterior col títulu El mio cantar, cambia agora la denominación pa facela inclusiva a la parte de gallego-asturianu. El resultáu d’aquella primer edición foi un discu que se distribuyó pelos centros educativos del Principáu y que ta accesible nes plataformes Youtube y Spotify.

La publicación n'Educastur incluye un dossier pal profesoráu bien completu cola propuesta didáctica, les bases del concursu y aplicaciones pal aula, disponible nesti enllaz:  https://www.educastur.es/-/al-son-del-cantar-un-proyectu-d-anovacion-educativa 
 

Información complementaria