La fiesta de la lliteratura asturiana anguaño va celebrase nuna fecha distinta a l’avezada: del 28 de setiembre al 2 d’ochobre. L’aplazamientu de la Selmana de les Lletres Asturiaes, que diba festexase en mayu, foi por causa del estáu d’alarma y les midíes de confinamientu decretaes pola crisis del coronavirus. El determín tomose d’alcuerdu ente’l Gobiernu asturianu y l’Academia de la Llingua Asturiana.

La Selmana va tar dedicada a la figura de la escritora de Villaviciosa María Teresa Villaverde (1881-1934), que firmaba dellos de los sos escritos como Tuxa. Col lema Tuxa, sentimientu y tradición, esta poeta, narradora y dramaturga va recordase cola edición en volume de la so obra localizada. Tamién va producise un videu sobre la so persona y l’entornu cultural y social que la arrodiaba.

Como ye vezu, tamién se va celebrar el Día del Llibru Asturianu, que va ser el vienres 2 d’ochobre, y nel que collaboren les llibreríes principales d’Asturies.