Cangas del Narcea va acoyer esti xueves, 8 d’avientu, el conciertu Música d’eiquí, música p’agora, un eventu promovíu dende la Conseyería de Cultura, Política Llingüística y Turismu p’allegar al públicu la producción musical contemporánea en llingua asturiana de la mano de los sos creadores y intérpretes.

El conciertu va empezar a les 13:30 hores y va celebrase na cai Mayor de la capital canguesa, abiertu a tol públicu que quiera y con calter gratuitu. El cartel de Música d’eiquí, música p’agora incluye les actuaciones d’Alfredo González, Silvia Quesada y el dúu L-R, integráu por Leticia González y Rubén Bada.

Alfredo González ye un cantautor de sonadía que tien na so discografía trabayos tanto en castellanu como n’asturianu, pa los que cuntó cola collaboración del poeta Pablo Texón. Amás d’interpretar los sos propios temes, el cantante y pianista turonés va acompañar a Silvia Quesada, cantante tinetense con composiciones que s’averen al pop eléctricu más colorista. 

De siguío, va actuar el dúu L-R, formáu por Leticia González y Rubén Bada, panderetera y guitarrista respectivamente, dos músicos con una trayectoria llarga nel mundu de la música tradicional que nel 2016 formaron esti proyectu. Baxo la etiqueta postfolk asturianu, L-R mecen los soníos de la tradición asturiana de pandereta con soníos de guitarra eléctrica que los alleguen al universu sonoru actual de xéneros como’l rock y el blues. 
 

Información complementaria