La ventésima octava edición del Premiu «Xuan María Acebal» de Poesía n'asturianu fallóse esti 27 de xunetu en favor de l'autora Marta Mori d'Arriba cola obra Los carreros del tiempu. Nel acta del fallu, el xuráu destaca «la claridá, la elegancia, l'equilibriu ente lo clásico y la contemporaneidá, la sensibilidá social nada impostada y la naturalidá llingüística». El xuráu quixo valorar amás el nivel de les propuestes presentaes.

El xuráu d'esta edición tuvo presidíu pol director xeneral de Política Llingüística, Antón García, y integráu poles filólogues Marina Pangua y Iris Quintana, la poeta Elvira Laruelo y los poetes Rodrigo Olay y Pablo Texón, quien ganó la edición pasada. Actuó como secretaria Laura Marcos, filóloga de la Dirección Xeneral de Política Llingüística.

Marta Mori d'Arriba nació en Xixón en 1965. Ye Doctora en Filoloxía Española y trabaya como profesora nel IES Xovellanos y na Universidá d'Uviéu. Ye vicepresidenta de l'Academia de la Llingua Asturiana y dirixe la revista Lliteratura, que publica esta institución. Como poeta ganó dos veces tanto'l Premiu «Teodoro Cuesta» (nel 2002 con Pórticu y nel 2007 con El tiempu de la espera) como'l Premiu «Xuan María Acebal»: nel 2010 con La mio voz y na presente edición. Ye autora tamién del llibru de relatos Histories familiares (2008) y d'una traducción de Paul Valéry, El cementeriu marín (2018), amás del poemariu Orfandá (2019).
 
El Premiu «Xuan María Acebal», convocáu pola Conseyería de Cultura, Política Llingüística y Turismu, ta dotáu con 6.000 euros y la publicación de la obra ganadora.
 

Información complementaria