Les propuestes escéniques en llingua asturiana de Nun Tris, Kamante Teatro, Factoría Norte y Carlos Alba son les finalistes de la sesta edición del Premiu «Nel Amaro» de Teatru Profesional en llingua asturiana o gallego-asturianu. El xuráu reunióse va poco pa valorar les candidatures y determinar los finalistes d'esta edición, que son:

• Kamante Teatro, col espectáculu Con M mayúscula.
• Producciones Nun Tris, col espectáculu La Sierva Patrona.
• Factoría Norte, col espectáculu Aventurina, l’ablana. 
• Carlos Alba, col espectáculu Les madreñes vacíes.

El Teatru Filarmónica d'Uviéu va acoyer los vienres 7, 14, 21 y 28 del próximu mes d'ochobre les representaciones de caúna de les obres finalistes del «Nel Amaro».

El Premiu «Nel Amaro» de Teatru Profesional en llingua asturiana o gallego-asturianu convócase cola mira de consolidar, arriquecer y prestixar estes dos llingües nel ámbitu del arte dramáticu, y ta dotáu con 6.000 euros. La entrega del gallardón va facese nuna ceremonia onde va compartir protagonismu con quien llograren los premios lliterarios en llingua asturiana nes categoríes de cómic, ensayu, lliteratura infantil y xuvenil, novela y poesía que convoca tamién el Gobiernu del Principáu d'Asturies.

El premiu y festival lleva'l nome de Nel Amaro (1946-2011), qu'abrió a últimos de la década de los setenta del sieglu pasáu'l camín pa la vanguardia teatral n'asturianu. Ente les sos obres de teatru destaquen Xénesis o alborá de la concencia (1978), Glayíos nueos, vieya murnia (1979), L'únicu rebalbu (1980) y Antígona, por exemplu, que ganó'l premiu de teatru de l'Academia de la Llingua Asturiana en 1991. Les manes en caxón (2003) foi la so última publicación teatral. Na edición última d'esti premiu, l'espectáculu ganador resultó ser La reina de la guapura de Leenane, de Producciones Nun Tris.