Premiu Camaretá al Meyor Cantar
Dende’l 2007 convócase’l Premiu al Meyor Cantar, qu’a partir del 2020 pasa a llamase «Camaretá al Meyor Cantar». Rinde homenaxe asina a Camaretá, la primer agrupación musical y lliteraria del Surdimientu, formada en Samartín del Rei Aurelio en 1975, de la que salieron músicos como’l dúu Nuberu, Nel Xiblata o los poetes Manuel Asur y Xuan Marcos.
El premiu, dotáu con 6.000 euros, convócase pa cantares n’asturianu o en gallego-asturianu de cualquier xéneru, con lletra y música orixinales o con lletra orixinal sobre melodíes yá existentes.
Gala final del XV Premiu Camaretá al Meyor cantar
Domingu 12 de payares. 19:00
Saca la to entrada pinchando equí.
Finalistes 2023
Marisa Valle Roso. Tonada (lletra: Tradicional / Marisa Valle Roso).
Esta intérprete llangreana lleva dedicada a la música dende la infancia y dende mui pronto destacó como una de les voces renovadores de la tonada, con una trayectoria qu’incluye dellos trabayos discográficos y les xires Marisa canta a… y Suena la mina. Collaboró con artistes de la talla de Víctor Manuel, Rozalén, Ses o Diana Navarro, ente otros.
Alienda. Zanca de cabra (lletra: tradicional / Roberto González-Quevedo)
Alienda ye un grupu de power folk, xéneru qu’amiesta música y instrumentos tradicionales asturianos con elementos d’otros estilos. Tienen grabáu l’EP Alendando (2014); y Alienda (2023), el so primer discu de duración llarga del que «Zanca de cabra» salió como adelantu nel 2022. El grupu ta formáu por Bárbara González-Quevedo (violín y voz), Illán Escalada (gaita), Francisco Rodríguez (bouzouki), Edu Llosa (percusiones), Carlos Castro (baxu) y Emilio Amboage (guitarra).
Vero Rubio. Dixo miou padre (lletra: Vero Rubio)
Verónica Rodríguez Rubio, más conocida como Vero Rubio, nació en Cangas del Narcea en 1981. Esta multiinstrumentista toca’l pianu, la trompeta, la trompa y el bodhram, y la so carrera desenvuélvese ente’l mundu de la música clásica, onde tuvo la oportunidá de tocar con orquestes como la Orquesta Sinfónica de Barcelona y Nacional de Catalunya (O.B.C.), y el del jazz. Anguaño, toca en dellos grupos de distintos estilos (folk, rock, improvisación llibre, jazz...): Orquesta Céltica Asturiana, Sonámbulos, Improviso... Amás compaxina esti llabor como instrumentista cola composición y producción de la so música de manera independiente.
José Manuel Tejedor. Les tos nales (lletra: Gema Fernández)
José Manuel Tejedor ye ún de los gaiteros más premiaos del panorama asturianu, con tres premios Macallan del festival de Lorient, un Premiu Nacional de la Música y dellos premios AMAS. Fixo abondes actuaciones en festivales intercélticos de toa Europa, foi teloneru d’artistes como Van Morrison y Sinead O’Connor y collaboró colos nomes más destacaos del folk internacional. Esta canción pertenez al últimu trabayu, Lluz.
Llistáu de ganadores
2007. Azul y gris, Toli Morilla (lletra: Marta Mori)
2008. Nosh, Herbamora (lletra: Carmen Trevías)
2009. La nada y tu, Alfredo González (lletra: Antón García)
2010. Tierra, Xera (lletra: Xera)
2011. Condenáu, Skama la Rede (lletra: David Artime)
2012. Si nun conoces Vaḷḷouta, Asturiana Minning Company (lletra: M. González)
2013. Ensin ti, Taranus (lletra: Diego Díaz Martino)
2014. Volviche, Banda de Gaitas El Trasno (lletra: Xosé Miguel Suárez Fernández)
2016. La lloca, Anabel Santiago (lletra: Xulio Arbesú)
2017. La ñeve y la esmeralda, Luis Núñez y los Folgazanes (lletra: Luis Núñez)
2019. Les sombres sobre la yerba, Lafu y Rebeca (lletra: Alejandro Lafuente)
2020. Rambalín, Rodrigo Cuevas (lletra: Rodrigo Cuevas)
2021. El que conoz a tierra, Carla Armas y Rubén García (lletra: Rubén García)
2022. Coral y maera, Algaire (lletra: Luis Ángel Fernández Santos)