Depués de la gala celebrada nel Cine Fantasio de Navia’l pasáu 14 de payares, Rodrigo Cuevas salió escoyíu ganador del Premiu al Meyor Cantar «Camaretá» na so decimosegunda edición, correspondiente a los cantares n’asturianu y gallego-asturianu publicaos y difundíos en 2020. 

Al premiu presentábense tamién artistes como Mapi Quintana con «Cantar pa durmir a un ninín» (na variante l.leniza de la llingua), Slum Suit con «L’espeyu» y Silvia Quesada con «La mesma revolución». 

El cantar de Cuevas rinde homenaxe a Alberto Alonso Blanco «Rambal», un popular tresformista del barriu xixonés de Cimavilla que nun ocultaba la so homosexualidá y que foi asesináu nos años 70 del sieglu XX. 

Nesta edición decimosegunda, el premiu garra’l nome «Camaretá», col enfotu de recordar al colectivu  qu’impulsó la recuperación de la cultura autóctona y la creación de música d’autor espresada n’asturianu nos años de la Transición. 

La gala, copresentada por Fernando Valle Roso y Norma Menéndez n’asturianu y gallego-asturianu respectivamente, foi retresmitida pela TPA.

Foto: Ricardo Gaete