La séptima edición del Premiu «Nel Amaro» de Teatru Profesional n'asturianu yá tien finalistes. Los montaxes de Saltantes Teatro, Carlos Alba y Escenapache va exhibise dende'l vienres 29 de setiembre nel VII Festival Nel Amaro de Teatru Profesional en llingua asturiana. Nel certame van representase les trés obres finalistes qu'opten al premiu del mesmu nome, escoyíes pol xuráu nuna primer fase celebrada nel mes de mayu. 

El Premiu «Nel Amaro» ta convocáu pola Conseyería de Cultura, Política Llingüística y Turismu nel contestu de los premios lliterarios y artísitcos en llingua asturiana o gallego-asturianu, y pueden presentase a él empreses del sector profesional dedicaes a la producción y representación d'espectáculos teatrales. 

El xuráu, integráu por especialistes en teatru y llingua asturiana y presidíu pol director xeneral de Política Llingüística, Antón García, escoyó na so primer xunta estos trabayos pa representase nel V Festival Nel Amaro nes feches indicaes:

  • Xuan Soldáu, de Carlos Alba (6 d'ochobre).
  • El gorrumbu, de Saltantes Teatro (13 d'ochobre). 
  • Caperucita en Muniellos, d'Escenapache (20 d'ochobre).

Amás, esti añu'l públicu va tener ocasión de volver disfrutar de les obres ganadores del añu 2021 y 2022, La reina de la guapura de Leenane, de Nun Tris Producciones, y Les madreñes vacíes, de Carlos Alba, que van abrir y zarrar, respectivamente, el festival los díes 29 de setiembre y 27 d'ochobre. 

El Teatru Filarmónica d'Uviéu va acoyer les representaciones, con entrada llibre y de baldre hasta completar aforu. Les representaciones, aptes pa tolos públicos y empobinaes a un públicu familiar, van empezar a les 18:30 hores, sacante la de La reina de la guapura de Leenane, que se va facer a les 20:00 por ser una obra pa públicu adulto. 

El Premiu «Nel Amaro» de Teatru Profesional, dotáu con 6.000 euros, convócase cola mira d'afianzar, arriquecer y prestixar la llingua asturiana y el gallego-asturianu nel ámbitu del arte dramáticu. Amás, el Principáu promueve la representación de la obra a lo llargo del territoriu asturianu al traviés del programa Autores nel Camín.

El premiu y el festival lleven el nome del autor turonés Nel Amaro (1946-2011), consideráu una referencia fundamental na vanguardia teatral n'asturianu. Nel Amaro foi amás l'autor al que se dedicó la edición de la Selmana de les Lletres Asturianes nel 2021. 
 

Información complementaria