Un total de 80 obres, 13 más que nel 2022, concurren esti añu a les convocatories de los premios lliterarios que'l Gobiernu d'Asturies impulsa pa reconocer la producción lliteraria en llingua asturiana y l'artística y escénica n'asturianu y eonaviegu. La Conseyería de Cultura, Política Llingüística y Turismu destina un total de 57.000 euros a la dotación de los diez gallardones, amás de la publicación de les obres ganadores y la presencia de los autores y de los espectáculos ganadores nel circuitu Autores nel Camín del programa Asturies Cultura en Rede.

Ye menester destacar dientro de les candidatures del 2023 la respuesta a la primer convocatoria del Premiu «Pachín de Melás» de Testos Teatrales, que recibió nueve obres. El premiu ta dotáu con 6.000 euros y la estrena del montaxe ganador dientro del circuitu de teatru profesional asturianu. El Pachín de Melás ye un gallardón de creación nueva a sumar a los impulsaos pela primer vez nesta llexislatura: el Premiu «Florina Alías» a la Meyor Traducción y l'«Enriqueta González Rubín» de Narrativa Moza.

La Dirección Xeneral de Política Llingüística promueve amás, en collaboración colos servicios de normalización de les entidaes locales, los premios de poesía «Ría del Eo» y de lliteratura infantil «Quiastolita» n'eonaviegu.

Les convocatories del 2023 zarráronse cola presentación de les candidatures siguientes nes diferentes categoríes:

• Premiu «Xuan María Acebal» de Poesía: 15 obres.
• Premiu «Xosefa Xovellanos» de Novela: 6 candidates.
• Premiu «Máximo Fuertes Acevedo» d'Ensayu: 4 trabayos.
• Premiu «María Josefa Canellada» de Lliteratura Infantil y Xuvenil: 13 títulos.
• Premiu «Alfonso Iglesias» de Cómic: 6 obres. El ganador foi Xon de la Campa cola obra Misteriu nel soterrañu.
• Premiu «Florina Alías» a la Meyor Traducción: 12 trabayos.
• Premiu al Meyor Cantar «Camaretá»: 9 composiciones. Yá se conocen los cuatro finalistes: Marisa Valle Roso, Alienda, Jose Manuel Tejedor y Vero Rubio.
• Premiu «Nel Amaro» a la Meyor Producción Escénica: trés espectáculos, que van participar na final.
• Premiu «Enriqueta González Rubín» de Narrativa Moza: trés candidatures.
• Premiu «Pachín de Melás» de Testos Teatrales: nueve obres.