La obra Contando colos deos, firmada por Xosé Anxelu Gutiérrez Morán, foi gallardonada col Premiu «María Josefa Canellada» de Lliteratura Infantil y Xuvenil n'asturianu na so decimosesta edición.

El xuráu, que se reunió como vien siendo vezu en Santolaya (Cabranes), quixo resaltar l'altu nivel de calidá de les obres que se presentaron a esta convocatoria, tanto de les que diben dirixíes a la categoría infantil como de les escrites pensaes pal xuvenil. Del trabayu de Gutiérrez Morán destaca que ye «una obra qu'enllaza cola tradición oral, fai posible l'intercambiu ente los adultos y la infancia, tien un altu valor pedagóxicu y usa una llingua rica y curiada».

Nesta edición, y baxo la presidencia del director xeneral d'Acción Cultural y Normalización Llingüística, Antón García, el xuráu tuvo integráu pol alcalde de Cabranes, Gerardo Fabián, Alonso Zamora Canellada, fíu de María Josefa Canellada (autora que da nome al premiu), les escritores Alba Carballo y Blanca Fernández Quintana (ganadora de la edición anterior) y de la profesora y música Marina Pangua. Actuó como secretaria Laura Marcos, filóloga de la Viceconseyería de Cultura, Política Llingüística y Deporte.

Xosé Anxelu Gutiérrez Morán (Avilés, 1969) ye doctor en Bioloxía pola Universidá d'Uviéu y profesor d'investigación del Centru Oceanográficu de Xixón. Amás del so trabayu científicu (ye autor de más de 120 artículos en revistes internacionales y de dellos capítulos de llibru dientro del so ámbitu académicu), tien publicaos trés llibros de poesía n'asturianu: Países (Premiu «Teodoro Cuesta» 2004), Diversa memoria (Premiu «Teodoro Cuesta» 2008), Un ciertu desorde (Premiu «Xuan María Acebal» 2012). Ye'l ganador de la edición última del Xuan María Acebal. Tamién collaboró nel ensayu n'asturianu La ciencia n'otres palabres (2007).