Xulio Vixil Castañón (Bimenes, 1964) llevó'l Premiu «Xosefa Xovellanos» de Novela n'asturianu cola obra Miel amargo, de la que'l xuráu resaltó «que se trata d'una novela áxil, d'entretenimientu, que combina humor, amor y intriga y qu'esplora les posibilidaes qu'ufierta l'universu paralelu, basáu nes teoríes científiques sobre'l tema, por exemplu, la teoría de les cuerdes».

El Premiu «Xosefa Xovellanos», convocáu pola Viceonseyería de Cultura, Política Llingüística y Deporte, ta dotáu con 6.000 euros y la publicación de la obra ganadora.

El xuráu d'esta 44 edición del gallardón tuvo presidíu pola xefa de serviciu de Planificación Llingüística, Juncal Mónica García Velasco, y integráu por Natalia González Menéndez, llibrera; Liliana Díaz Gómez, profesora d'Educación Secundaria y Bachilleratu y Gonzalo González Barreñada, ganador de la edición anterior. Actuó como secretaria Lourdes Álvarez García, filóloga adscrita a la viceconseyería.

Xulio Vixil ye llicenciáu en Filoloxía Hispánica y espertu en Llingua Asturiana pola Universidá d'Uviéu. Profesor d'Enseñanza Secundaria, ye autor de llibros de creación lliteraria n'asturianu, ente los que destaquen los de poesía A la gueta l'alba y El suañu de los vivos; les noveles El paraísu blancu y L'inmoral; el llibru de relatos Silvia la negra y la traducción de la novela El diablu en cuerpu, de Raimond Radiguet.