Tres de la reunión celebrada'l pasáu día 22 de xunetu, el xuráu del premiu Camaretá al Meyor Cantar decidió escoyer como finalistes estos cuatro cantares: 

Carla Armas y Rubén García, con «El que conoz a tierra» (letra: Rubén García Martín) y música: Carla Armas Junco y Rubén García Martín).  

Tanto Carla Armas Junco como Rubén García Martín estudiaron composición nel Conservatoriu Superior de Música de Salamanca. Anguaño, damos son docentes nesta área; Rubén nel Conservatoriu Superior de Música d’Uviéu y Carla na Universidad Internacional de la Rioxa. Dende 2009 Carla y Rubén lleven participando en varios proyectos a comuña, consiguiendo también reconocimientos conxuntos pola composición de bandes sonoras pa documentales, cantares pop y proyectos asemeyaos.

 

L-R post-folk asturianu, con «Veis volver» (lletra: Leticia González Menéndez y música: Leticia González y Rubén Bada)

L-R ye un dúu formáu por Leticia González (voz y percusión) y Rubén Bada (guitarres eléctriques) que reinterpreta la música tradicional asturiana cola fusión d’instrumentos estremaos como la pandereta y la guitarra eléctrica.
El post-folk-asturianu ye un conceptu creáu pol grupu nel añu 2016, añu de la edición del so primer discu L-R. La idea naz al xunir dos esferes con orixe común: el folk y la música tradicional asturiana. Too ello col envís de revisar los términos dende los que se pensaba la rellación ente tradición y modernidá na música d'Asturies.

«Veis volver», cantar col que llegaron a la final del Premiu Camaretá al Meyor Cantar, ta incluyíu nel trabayu discográficu N.O.S.

 

¿Aú?, con «Tomasín» (lletra: Ruma Barbero y música: ¿Aú?)

El grupu fórmase nel añu 2016 y ta compuestu por cuatro persones veteranes de la música folk asturiana: Ruben Bada (buzuki, guitarra y voz), Ruma Barberu (bodhrán), Marga Lorences (acordión) y Dolfu R. Fernández (violín y voz). Parten de pieces tradicionales y composiciones propies basaes polo xeneral en ritmos asturianos. Pa ello válense de preseos presentes na tradición d'Asturies como l'acordión, el violín y la voz xunto con otros abondo habituales dende va delles décades nos grupos folk como'l buzuki, la guitarra y el bodhrán.

«Tomasín», el cantar col que'l grupu quedó finaista del Premiu Camaretá al Meyor Cantar, ye un romance compuestu a la manera tradicional que cunta unos fechos asocedíos nel conceyu de Tinéu nel añu 2011.

 

La Banda de Gaitas Camín de Fierro con «Flacos y ensin peinar» (lletra y música: Toli Morilla. Arreglos: Sam Rodríguez y Arsenio Ruiz) 

Esta banda naz nel añu 2002 impulsada pola Asociación Cultural La Nublina; los sos componentes formáronse na Escuela Municipal de Música de Los Valles del Oso.

Nel añu 2012 pubícase el so primer trabayu discográficu 10 años nel Camín col que consiguieron el premiu AMAS na categoría de gaita y el premiu de la crítica RPA a la meyor canción folk. 

Nesta ocasión, el cantar «Flacos y ensin peinar», perteneciente a Rock & Fierro, clasifícase entre los cuatro cantares finalistas de la XIII edición del Premiu Camaretá al Meyor Cantar.

 

El cantar ganador va decidise al final de la gala que se va facer el próximu día 27 de payares, onde los y les artistes han defender el tema en directo dende'l Centru Niemeyer d'Avilés; gala na que va dar tamién una actuación Rodrigo Cuevas, ganador de la edición pasada col tema «Rambalín» .