El xuráu del Premiu «Camaretá al Meyor Cantar» escoyó yá a los finalistes d’esta edición, que van ser Algaire, Mostru l’Horru y Dixebra.

Xixón va acoyer el sábadu 22 d’ochobre la gala de la decimocuarta edición del Premiu «Camaretá al Meyor Cantar». El Teatru de la Llaboral va ser l’escenariu onde los trés finalistes actúen pa que'l xuráu, formáu por especialistes en música y llingua asturiana, decida’l cantar ganador. Na gala tamién van ufiertar un conciertu Carla Armas y Rubén García, ganadores de la edición anterior d’esti premiu col cantar El que conoz a tierra.

Los cantares escoyíos como finalistes son: 

-Fíu d’un pueblu, de Mostru l’Horru (lletra de Francisco Méndez y música de Yannick Gutiérrez).

-Coral y maera, d’Algaire (lletra y música de Luis Ángel Fernández Santos) y 

-Como’l mar, de Dixebra (lletra y música de Primi Abella).

El Premiu «Camaretá al Meyor Cantar», dotáu con 6.000 euros, convócalu’l Gobiernu del Principáu d’Asturies cola mira de consolidar, prestixar y arriquecer la creación musical tanto n’asturianu como en gallego-asturianu.