Yá ta abierta la inscripción a los dos premios que la Conseyería de Cultura, Política Llingüística y Turismu convoca n’ámbitu de les artes escéniques pa la promoción de les producciones n’asturianu y gallego-asturianu: el Premiu Camaretá al Meyor Cantar y el Premiu Nel Amaro de Teatru Profesional

Dende la edición d’anguaño, el Premiu al Meyor Cantar pasa a llevar el nome de Camaretá, la primer agrupación musical y lliteraria del Surdimientu, formada en Samartín del Rei Aurelio en 1975, de la que salieron músicos como’l dúu Nuberu, Nel Xiblata o los poetes Manuel Asur y Xuan Marcos. El premiu, dotáu con 6.000 euros, convócase pa cantares n’asturianu o en gallego-asturianu de cualquier xéneru con lletra y música orixinales o con lletra orixinal sobre melodíes yá existentes.

Nel Premiu Nel Amaro de Teatru Profesional n’asturianu y gallego-asturianu, dotáu con 6.000 euros, los cuatro finalistes han defender les sos obres teatrales actuando en directo nel Festival de Teatru Profesional que lleva’l nome del autor turonés, que se vien faciendo nel Teatru Filarmónica d’Uviéu nel mes d’ochobre.