La Conseyería de Cultura, Política Llingüística y Turismu va dedicar la Selmana de les Lletres Asturianes próxima al escritor Nel Amaro (Quentuserrón, Mieres, 1946 - Uviéu, 2011). L’homenaxe coincide col décimu aniversariu de la muerte del artista y colos 75 años del nacimientu.

Nel Amaro ye ún de los escritores más carismáticos y más queríos de les lletres asturianes. A lo llargo de la so trayectoria creativa echó a andar munches publicaciones: revistes, fancines o antoloxíes nes que dio entrada a varies xeneraciones d’escritores, ensin importar la llingua na que escribieren, el xéneru, la escuela o la tendencia. 

Como autor n’asturianu destaca’l conxuntu de la so obra, qu’abarca novela, poesía, teatro, ensayu o cuentos, y el fechu de tar siempre abriendo camín. Nel Amaro foi ún de los primeros escritores n’espublizar la poesía nueva del Surdimientu, el primeru n’espublizar una poética o reflexón sobre la razón de ser de la poesía nueva que se taba faciendo y el primeru n’escribir teatru nuevu. Anque tardó en publicar, dexó una nómina bien importante d’obres editaes y dalgunes inédites. 

Nos años últimos de la so trayectoria, ensin abandonar la producción lliteraria, afondó na faceta d’artista multidisciplinar y trató xéneros como’l mail-art, la poesía visual, performances o video arte. Amás, creó colectivos unipersonales como Espaciu Arte Escéntricu, Fundiziom Malevich, ONG performers sin fronteras y la Fundación Perrunosituacionista Lazslo Kovacs, ente otros. 

Dende 2017, l’escritor da nome al Premiu de Teatru Profesional en llingua asturiana y gallego-asturianu y al Festival nel que se representen les obres finalistes.

La Conseyería de Cultura consideró, d’alcuerdu cola familia, que la coincidencia en 2021 del décimu aniversariu de la muerte y los 75 años del nacimientu ye’l momentu afayadizu pa dedica-y a Nel Amaro la Selmana de les Lletres, reivindicar la so figura lliteraria y humana, y rendi-y un homenaxe nel que s’implique la sociedá lliteraria y artística asturianes. Cultura trabaya na programación d’un Añu Nel Amaro, nel que se-y pondría atención a la so obra y se promoveríen representaciones de los sos testos teatrales, igual que publicaciones sobre la so trayectoria personal y lliteraria y sobre’l so arte o exposiciones.