El Conseyu Superior d'Investigaciones Científiques acaba de publicar el Calendariu Científicu Escolar pal añu 2022. Esti documentu, empobináu a escolinos y escolines d'Educación Primaria y ESO ta disponible  pa descarga llibre y gratuita en diez llingües, ente elles l'asturianu, y recuerda una efeméride científica pa cada día, seya'l nacimientu d'una persona que se dedicó a la investigación o l'aniversariu d'un afayu importante.
Esta publicación pon un procuru bien especial n'evitar usos llingüísticos sexistes y en visibilizar los llogros de muyeres y persones LGTBI na ciencia, cola idea de desaniciar prexuicios que puean impedir que se desenvuelvan vocaciones científiques.
Amás del propiu calendariu, tamién se pue descargar una guía didáctica que dexa trabayar el so conteníu nos distintos cursos d'Educación Primaria y ESO. 
Accedi a la páxina de descarga  calcando nesti enllaz.