Miguel Rodríguez Monteavaro (Bual, 1991) salió escoyíu como beneficiariu de la primer edición de la Beca Asturies en Residencia, un proyectu nel que collaboren el Gobiernu del Principáu y la Residencia Literaria 1863.

Esta beca créase pa dar la oportunidá a los y les escritores n’asturianu y gallego-asturianu de pasar el mes d’avientu na Residencia Literaria 1863, dirixida pola poeta Yolanda Castaño. Esti apartamentu ta asitiáu nun edificiu singular d’A Coruña que se construyó en 1863, añu emblemáticu por ser cuando Rosalía de Castro publica Cantares gallegos y que se considera l’entamu del Rexurdimento de la lliteratura gallega.

Nesti enclave, que dende qu'abrió lleva acoyendo a creadores de países como Filipines, República Dominicana, Bolivia, Países Baxos, Finlandia o Estaos Uníos, espérase que l'autor escoyíu pueda desenvolver el so  llabor en condiciones d'escelencia y con dedicación intensiva. Pa ello va disfrutar, amás de del agospedamientu, d'una asignación pa gastos personales y de la oportunidá d'integrase na comunidá artística de la ciudá con invitaciones a actividaes culturales de toa mena.

La comisión de valoración, compuesta polos escritores Xuan Bello, Marta Mori y Laura Marcos, coordinaos pola mesma Yolanda Castaño, destacó «la calidá y rigor de la propuesta, la trayectoria del candidatu y l'interés del so proyectu interdisciplinar». Amás,  la comisión considera esta esperiencia «un apueste por un ecollingüismu real que favoreza l'intercambiu ente les comunidaes creadores d’Asturies y Galicia.

Miguel Rodríguez Monteavaro ye llicenciáu en Filoloxía Hispánica y anguaño estudiante de doctoráu na Universidá d'Uviéu, onde ye investigador nel campu de la dialectografía y dialectometría. Como poeta escribe tanto en gallego-asturianu como n'asturianu. Tien publicaos cuatro poemarios en gallego-asturiano: Trenta razóis pra nun medrar (2010), Todos os tristes de mayo (2013), Poemas pr’amantes y paquidermos (2014); y ún n'asturianu, Superpoderes (2019), col que ganó'l Premiu Asturies Xoven de Poesía. Tamién resultó ganador del I Premiu «Ría del Eo» de Poesía en gallego-asturianu, convocáu pol ayuntamiento d'A Veiga, cola obra Oi, que dice mama que volvas.  Amás, como músicu, participa nel grupo Caldo y os Rabizos, dedicáu a la recopilación y interpretación de la tradición musical del occidente d'Asturies. 
 

llinguastur.general.info-complementaria