El públicu infantil y mozo ye'l protagonista de la sesta edición del Festival Nel Amaro de teatru n'asturianu, entamáu pola Conseyería de Cultura, Política Llingüística y Turismu. La cita va llevar enriba de les tables del Teatru Filarmónica d'Uviéu los cuatro montaxes finalistes del Premiu «Nel Amaro» de teatru n'asturianu, promovíu pol Gobiernu d'Asturies.

Les cuatro compañíes finalistes de la convocatoria de 2022 son Kamante Teatro, Carlos Alba, Factoría Norte y Nun Tris Teatro. Les sos propuestes tienen como destinariu principal al públicu infantil y mozo. Los espectáculos van poder vese tolos vienres d'ochobre a partir de les 18:00 hores y la entrada ye llibre. El programa ye esti:

• Kamante Teatro con Con M mayúscula (7 d'ochobre).
• Carlos Alba con Les madreñes vacíes (14 d'ochobre).
• Factoría Norte con Aventurina, l'ablana (21 d'ochobre).
• Nun Tris Producciones con La sierva patrona (28 d'ochobre).
      
Tola información sobre la programación del Festival Nel Amaro 2022 puede consultase en www.festivalnelamaro.com.

El Premiu de Teatru Profesional «Nel Amaro», dotáu con 6.000 euros, convócase dende 2017 cola mira de consolidar, enriquecer y prestixar la llingua asturiana y l'eonaviegu nel ámbitu del arte dramáticu. La edición pasada del gallardón tuvo como ganador al espéctaculu La Reina de la guapura de Leenane, de la compañía Nun Tris. 

El premiu y el festival lleven el nome del autor turonés Nel Amaro (1946-2011), consideráu una referencia na vanguardia teatral n'asturianu. Nel Amaro foi amás l'autor al que se dedicó la edición de la Selmana de les Lletres Asturianes en 2021. 
 

llinguastur.general.info-complementaria