El Gobiernu del Principáu va celebrar el Día Internacional de la Llingua Materna (21 de febreru) con un programa ampliu d’actividaes culturales n’Uviéu, Xixón, Corvera y Teverga, amás de la publicación de materiales pedagóxicos nuevos que ya tán a disposición de la comunidá educativa nel portal Educastur.


La Viceconsejería de Cultura, Política Llingüística y Deporte va entamar actividaes gratuites rellacionaes col patrimoniu arqueolóxicu, les artes escéniques y l'artesanía de la llana y el telar tradicional. El so oxetivu ye revindicar la importancia y labayura que l'asturianu y el eonaviego representen dientro de la cultura asturiana.


El domingu 18 de febreru a les 12:00 h el Centru del Prerrománicu Asturianu va ufiertar una actividá sobre'l procesáu de la llana y el texíu en telar. Esi día pela tarde, a les 17:30, el teatru de Llaboral Ciudá de la Cultura va acoyer la obra de teatru de Carlos Alba El trasgu y el molineru, dirixida al públicu familiar. Esa mesma obra va poder vese nel mesmu sitiu a otru día, el llunes 19, a les 11:00 hores, nuna función pa públicu escolar.


El día 21 el Muséu Arqueolóxicu d’Asturies, n’Uviéu y a les 18:00 hores, ofrez una visita guiada n’asturianu a la so colección permanente. Esti mesmu día en La Lechera de Cancienes, Corvera, la compañía de teatru Saltantes Teatro va representar la obra El Gorrumbu, ganadora de la última edición de la convocatoria del Premiu Nel Amaro de Teatru Profesional en Llingua Asturiana.
P’acabar, tamién estos díes va haber ocasión de ver nel Parque de la Prehistoria de Teberga la esposición temporal llamada Mensaxes nos abismos. L’arte esquemáticu en Fresneo, que reproduz exemplos d'arte rupestre topaos en cueves del conceyu. Esta esposición va poder visitase hasta'l 30 de xunu.


Pela so parte, la Conseyería d'Educación publicó nel portal wwww.educastur.es una serie de recursos y conteníos dixitales, dirixíos a comunidá escolar. Una de les novedaes ye que les persones interesaes pueden acceder a los currículos n'asturianu de Llingua Asturiana y Lliteratura, lo mesmo de la etapa de Primaria como de la ESO. Siguirán-y traducciones d'otros currículos de la nueva llei educativa (LOMLOE).


Amás, actualizóse'l repositoriu de recursos dixitales “Estoyu/Estoiro” pa que'l profesoráu pueda utilizalu nel aula con un alumnáu nativo dixital. Son más de 500 recursos n'asturianu y unos 200 n’eonaviegu, entamaos con criterios educativos, qu'incorporen actividaes dedicaes a efemérides concretes y realizaes pol Centru del Profesoráu y Recursos (CPR) Cuenques Mineres. Tamién se creen secciones nueves de podcast, aplicaciones y xuegos dixitales.


A lo último, ufiértense actividaes dixitales pa conmemorar la efeméride nel aula, con conteníos interactivos (genially) o xuegos d'escape. El material agrúpase en cuatro bloques: una presentación xeneral, actividaes pa Primaria y Secundaria, pa Secundaria y conteníos d'ediciones anteriores.
Amás de la disponibilidá nel portal Educastur, los materiales fueron unviaos a los más de 300 docentes de Llingua Asturiana y Lliteratura esistentes nel Principáu.


Esti Día Internacional de la Llingua Materna, que lleva por lema Educación multilingüe: una pilastra del aprendizaxe interxeneracional, pretende resaltar el papel esencial de la llingua na configuración de les sociedaes políglotes y multiculturales, y cómo los idiomes conviértense nel vehículu de tresmisión y preservación del conocimientu y la cultura, amás de fomentar la tolerancia y el respetu de los otros.

Programa del Día de la Llingua Materna n'asturianu

Programa del Día da Llingua Materna en eonaviego

llinguastur.general.info-complementaria