El proyectu Retablu rural, una mirada realista a l'aldea contemporánea, de Pablo X. Suárez, va ser beneficiariu de la Beca Asturies, que supón una residencia de creación lliteraria n'A Coruña pa un escritor en llingua asturiana o eonaviegu ente'l 1 y el 31 d'avientu del 2022. La Conseyería de Cultura, Política Llingüística y Turismu impulsa la iniciativa en collaboración cola Residencia Lliteraria 1863. 

El xuráu, que formaben los escritores Francisco Álvarez, Esther Prieto y Miguel R. Monteavaro, ganador de la beca na convocatoria anterior, destacó la propuesta narrativa mui bien estructurada y con una mirada novedosa sobre'l mundu rural asturianu. El xuráu destaca la calidá de tolos proyectos presentaos.

Pablo X. Suárez

Pioneru y animador de les tendencies nueves de poesía oral n'Asturies cola creación de les Timbes Poétikes nel añu 2009 y la organización del festival Sacavera Sound, Pablo X. Suárez (Siero, 1981) ye, amás d'escritor, llicenciáu en Filoloxía Hispánica pola Universidá d'Uviéu (2004), especialista en llingua asturiana (2006) y técnicu en normalización llingüística na Mancomunidá Comarca de la Sidra dende l'añu 2009.

Hasta la fecha tien publicaos los poemarios Pop Retórika (Glayíu, 2009) y Cómo evitar el apocalipsis (La novia de nadie, 2016) en castellanu; y Asturiana Beat (Trabe, 2005), El sistema débeme una chocolatina (Suburbia, 2011) y Little Babilonia (Saltadera, 2018), premiu Xuan María Acebal 2017, n'asturianu.

La so obra narrativa ta recoyida nel volume de relatos Yoni y yo (Suburbia,2010), premiu de la Crítica d'Asturies nel 2010, amás d'en revistes como Lliteratura, Campo de los Patos o Formientu. Con ella foi premiáu en dellos concursos de cuentos.

Apaez en diverses obres colectives y antoloxíes. Como articulista, tien collaborao en medios como'l selmanariu Les Noticies, Diagonal, Nortes o El Salto diario. Na so faceta de poeta escénicu, mantién el proyectu El Velcro xunto col productor de música electrónica Dudu García, y tien pasao per varios festivales internacionales.

Residencia Lliteraria 1863

Asitiada nel corazón d'A Coruña, les instalaciones de la Residencia Lliteraria 1863 funcionen dende'l 2019 pa facilitar la máxima concentración y inspiración nel trabayu lliterariu, acoyendo autores de mui diverses partes del mundu. La Residencia ta al llau d'onde nació la Real Academia Galega y d'onde residieron Emilia Pardo Bazán, Rosalía de Castro o Pablo R. Picasso.