La Conseyería de Cultura, Política Llingüística y Turismu convocó la sesta edición del Premiu «Nel Amaro» de Teatru Profesional n'asturianu o gallego-asturianu, que busca contribuyir a consolidar, arriquecer y prestixar estes dos llingües nel ámbitu del arte dramáticu. Nesta ocasión, la propuesta ganadora va recibir 6.000 euros, amás d'una pieza artística. Enllaz a la convocatoria y al procesu de solicitú: https://tinyurl.com/premiuteatru

Al gallardón pueden optar les obres de compañíes profesionales que yá s'estrenaren, tanto orixinales como versiones o adaptaciones de títulos n'otres llingües, que nun resultaren finalistes na edición anterior. El plazu pa presentar los proyectos remata esti 6 de xunu. 

Un xuráu formáu por persones espertes en teatru y llingua asturiana va ser quien s'encargue d'escoyer les propuestes finalistes. Les compañíes seleccionaes van representar eses obres nel VI Festival Nel Amaro de Teatru Profesional, entamáu cola collaboración del Conceyu d'Uviéu, que se va celebrar los cuatro primeros vienres d'ochobre nel Teatru Filarmónica. Depués de les actuaciones, el xuráu va decidir la compañía ganadora.

Como parte del reconocimientu, la Conseyería de Cultura, Política Llingüística y Turismu va contribuyir a la promoción y difusión de la obra premiada nos medios de comunicación y va promover la representación de la obra gallardonada pelos conceyos del territoriu asturianu al traviés del circuitu Autores nel Camín del programa Asturies Cultura en Rede.  

El premiu y festival lleva'l nome de Nel Amaro, autor fallecíu nel 2011 y qu'a últimos de la década de los setenta del sieglu pasáu abrió'l camín pa la vanguardia teatral n'asturianu. Ente les sos obres destaquen Xénesis o alborá de la concencia (1978), Glayíos nueos, vieya murnia (1979), L'únicu rebalbu (1980) y Antígona, por exemplu, que ganó'l premiu de teatru de l'Academia de la Llingua Asturiana en 1991. Esti autor foi homenaxáu nel 2021, dedicándo-y los actos y publicaciones de la 42 Selmana de les Lletres Asturianes. 

El palmarés d'esti premiu, instauráu nel 2017, incluye les obres Llázaro de Tormes, de Carlos Alba (2017), Hansel y Gretel, d'Higiénico Papel Teatro (2018), Les rellaciones peligroses (2019), de Factoría Norte, El viaxe de Covaletti, también d'Higiénico Papel Teatro (2020) y La reina de la guapura de Leenane, de Nun Tris (2021).
 

llinguastur.general.info-complementaria