El xueves 22 d'abril de 2021 ponse en marcha'l circuitu lliterariu «Autores nel Camín 2021», que la Dirección Xeneral de Política Llingüística entama cola idea doble de d'averar al públicu a los y les autores que llevaron dalgún de los premios lliterarios n'asturianu y al tiempu participar na celebración del Añu Xacobéu 2021. 

Esta acción de poner en contactu al públicu asturianu coles persones ganadores de los premios más prestixosos de les lletres asturianes yá taba prevista pa 2020, pero tuvo que retrasase por cuenta de la situación sanitaria. De toes maneres, nesti circuitu van participar tanto autores que ganaren en 2019 como en 2020, amás d’autores en gallego-asturianu, que van incorporase al programa del segundu semestre de 2021. Estos actos van tener distintos formatos, como alcuentros, recitales, talleres, etc., y cuenten cola participación de los Servicios de Normalización de los distintos conceyos, anque tamién van poder participar nellos otres instituciones como cases de cultura o biblioteques. 

Nesti momentu ta zarrada la programación del primer semestre de 2021, que prevé 14 alcuentros espardíos pela xeografía asturiana en llugares como Nava, Candás, Llangréu, Colunga, Grau y L.lena, y que cunten cola participación d’autores como Francisco Álvarez, Inaciu Galán, Vero Suari, Ruma Barbero, Alberto Vázquez, Sidoro Villa o Gonzalo G. Barreñada. Esti últimu, ganador en 2019 del Premiu «Xuan María Acebal» de Poesía con El llar n’orde, va ser l’encargáu d’abrir el circuitu con un alcuentru que va tener llugar nel Centru Sociocultural de Les Vegues (Corvera), el xueves 22 d’abril a les 18 h. La programación del segundu semestre del añu va anunciase a lo llargo del mes de xunu.

llinguastur.general.info-complementaria