La Conseyería de Cultura, Política Llingüística y Turismu abre’l xueves 3 de febreru'l ciclu «Uviéu Abierto», onde s’enmarquen una serie d’actos culturales alredor de la llingua y la cultura asturiana. El programa ellaboráu pola Dirección Xeneral de Política Llingüística va desenvolvese na Biblioteca Ramón Pérez de Ayala d’Uviéu a lo llargo de febreru y marzu.

El ciclu empieza coles presentaciones de les obres ganadores de los Premios Lliterarios en llingua asturiana del añu 2020, y incluye estes presentaciones: 

3 de febreru: Hai una llinia trazada, de Xune Elipe, XXVI Premiu «Máximo Fuertes Acevedo» d'Ensayu en llingua asturiana.

10 de febreru: La curuxa Catuxa, d'Inaciu Galán y Vero Suari, XIII Premiu «María Josefa Canellada» de Lliteratura Infantil y Xuvenil en llingua asturiana.

17 de febreru: El fervinchu, de Sidoro Villa, XLI Premiu «Xosefa Xovellanos» de Novela en llingua asturiana.

24 de febreru: Tayu, d'Alejandro Fernández-Osorio, XXVI Premiu «Xuan María Acebal» de Poesía en llingua asturiana.

3 de marzu: El sol na escombrera, d'Alberto Vázquez, XII Premiu «Alfonso Iglesias» de Cómic en llingua asturiana. 

24 de marzu: Seltegu, de Ruma Barbero, XI Premiu «Alfonso Iglesias» de Cómic en llingua asturiana. 

Los actos, con entrada llibre y gratuita hasta enllenar aforu, van escomenzar a les 19:00 hores, a escepción de les presentaciones del día 3 de febreru, qu’empieza a les 18.30 hores, y la del día 10, que va escomenzar a les 17:30 por ser un actu empobináu al públicu infantil. 

Los Premios Lliterarios en llingua asturiana, dotados con 6.000 euros, convóquense añalmente col fin de consolidar, arriquecer y prestixar la llingua asturiana.