El Gobiernu d’Asturies pon en marcha’l Reguerada Fest, una iniciativa que naz como puntu d’alcuentru de la cultura y el mundu empresarial n’asturianu. La cita, entamada pola Conseyería de Cultura, Política Llingüística y Turismu cola collaboración del Conceyu de Carreño y el sofitu del Ministeriu de Cultura, va celebrar la so primer edición del 3 al 6 de payares en Candás y va ufiertar al públicu un programa d’actividaes con más d’una docena de convocatories gratuites y una feria onde van tar presentes 15 empreses y entidaes qu’usen la llingua asturiana nel so trabayu profesional.

El director xeneral de Política Llingüística, Antón García, l’alcaldesa de Carreño, Amelia Fernández, y el coordinador del Reguerada Fest, Xaime Martínez, presentaron esta mañana esti festival nuevu, que naz con vocación d’averar a la sociedá asturiana l’actividá que desenvuelven creadores, entamadores y organizaciones sociales alredor de la llingua asturiana. L’alcuentru rinde homenaxe a Antón de Marirreguera, natural de Carreño y autor de la que se considera la primer obra lliteraria conservada n’asturianu, fechada nel sieglu XVII.

La programación, gratuita y dirixida a tolos públicos, incluye una feria, recitales lliterarios, talleres, charles, esposiciones y conciertos. La Fábrica d’Ortiz va acoyer la feria d’empreses, con quince entidaes participantes: Acuto, Al Otru Andar, Cerveza Cotoya, Cuatro Gotes, Díes Adulces, Ediciones Trabe, Espacio Nube, Música Asturiana, Puru Remangu, Pintar-Pintar Editorial, Ringo Rango, Tiza y Peonza, Nordés Móvil, Delallama y Mondo Manzana.

El programa incluye meses redondes sobre l’actividá empresarial y l’usu de la llingua asturiana, actividaes artístiques, amás de charles que van tratar asuntos como les esperiencies de xestión y programación n’espacios rurales, la traducción a la llingua asturiana, alcuentru de creadores o llectures poétiques. Van facese amás talleres de baille tradicional, de llectura, o de poesía y cómic pa tolos públicos.

La esposición Soi yo lleendo, comisariada pola galería Dos Ajolotes, pon en rellación a dellos autores de lliteratura asturiana, al traviés de los sos testos, con artistes que trabayen inspirándose naquellos conteníos pa ofrecer la so interpretación personal dende l’arte.

La ufierta musical del Reguerada Fest va tener en cartel a la Orquesta Céltica Asturiana, Pop Piquiñín, Xosé Antón Ambás y Ramsés Ilesies. Tamién va poder disfrutase de la música tradicional de L-R, el dúu formáu por Leticia Baselgas y Rubén Bada, y propuestes de fusión ente poesía y música electrónica

Les artes escéniques tamién va tener el so espaciu cola reinterpretación del teatru costumista de Pachín de Melás al cargu de la compañía Vibra y una revisión del monólogu tradicional por Carlos Alba, Cellero, ente otres actividaes.

Descarga'l programa d'actividaes nesti enllaz.