La Conseyería de Cultura, Política Llingüística y Turismu presentó’l videuclip del tema Rambalín, promovíu pola Dirección Xeneral de Política Llingüística como parte de la dotación del premiu Camaretá al Meyor Cantar, llográu pola composición de Rodrigo Cuevas na so última edición.

El videuclip del tema del artista uviedín realizóse, al traviés de la Sociedá Pública de Xestión y Promoción Turística y Cultural del Principáu d’Asturies, pola productora asturiana El Cohete y dirixólu la realizadora Marta Lallana.

El cantar, y polo tanto la pieza audiovisual, xira alredor de la vida y la muerte de Rambal, un personaxe emblemáticu nel imaxinariu de Xixón y un referente de la historia del barriu de Cimavilla. El tratamientu del videuclip ta cercanu al documental, con personaxes reales que viven nel barriu y con escenes averaes a la so realidá qu’evoca l’alcordanza común que tresmite’l tema.

Marta Lallana señala que la so intención foi crear una pieza “qu’en cuenta de sobresplicar lo que yá cunta la lletra, apurriere una dimensión ente la realidá y la poética, apelando a l’alcordanza de l’ausencia de Rambal y a la so tan inspiradora llibertá”. Lallana añede que “quería xugar cola idea de que’l cantar fore como una especie d’himnu qu’habita nos vecinos de Cimavilla, retratando la so ausencia al traviés d’alcontralu presente nos sitios que percorría”.

El cantar Rambalín foi escoyíu ganador de la XII edición del premiu Camaretá al Meyor Cantar na gala final que se fixo nel Teatru Fantasio de Navia’l 15 payares del 2020.

Rambalín ye una habanera dedicada a la figura d’Alberto Alonso Blanco, Rambal, un personaxe abondo popular nel Xixón de les décades 60 y 70 del sieglu pasáu. La so homosexualidá reconocida abiertamente nunos años bien complicaos pa facelo y el so asesinatu en 1976, un socesu entá ensin resolver, dan a la vida de Rambal la singularidá que Rodrigo Cuevas reflexa nel so tema. El cantar compónse de dos testos de Fredesvinda  La Tarabica, la lletra ye de Rodrigo Cuevas y la música, del artista uviedín y Raül Refree. Rodrigo Cuevas (Uviéu, 1985) tien una trayectoria de prestixu reconocíu na música y nes artes escéniques asturianes y nacionales.

El videuclip zárrase con una dedicatoria especial de Rodrigo Cuevas, que resume la intención esencial de la so composición: “A toles persones que, cuando tas avezáu a vivir ente’l despreciu y la vergoña, te miren con tresparencia, t’acompañen con respetu y te faen decatate de que la vida pue ser maraviyosa. A los playos y les playes que asina lo ficieron. Gracies”.