Educación
Dende’l cursu 1984/1985, la enseñanza de la Llingua Asturiana empezó a impartise oficialmente nuna serie de centros educativos públicos, aumentando’l númberu d’ellos nos años socesivos. La enseñanza del Gallego-Asturianu nel so ámbitu xeográficu empezó nel cursu 1990/1991. Como resultáu d’esta esperiencia, son miles d’alumnos y alumnes los que recibieron esta enseñanza llingüística, aprendiendo a lleer, escribir y falar la llingua asturiana y el gallego-asturianu.
Dendel’añu 2007, nos Decretos 56/2007, de 24 de mayu y 74/2007, de 14 de xunu, polos que se regula la ordenación y s’establez el currículu de la Educación primaria y secundaria obligatoria, respectivamente, nel Principáu d’Asturies, incorpórense la Llingua Asturiana y Lliteratura y el Gallego-Asturianu como materies optatives d’ufierta obligada en tolos centros educativos.
Güei, Llingua Asturiana y Gallego-Asturianu son materies del currículu que s’ufierten en tolos centros públicos y concertaos d’Enseñanza Primaria y Secundaria.
El Gobiernu del Principáu d’Asturies, pa cumplir la Llei 1/1998, de 23 de marzu, d’usu y promoción del bable/asturianu, realiza les acciones que considera necesaries. Asina, el Ministeriu d’Educación, Cultura y Deporte redactó nel testu definitivu de la LOMCE, a pidimientu de la Conseyería d’Educación del Principáu d’Asturies, la Disposición adicional trentésima octava Llingua castellana, llingües cooficiales y llingües que gocen de protección llegal. D’esta forma garantízase la presencia de la Llingua Asturiana y Lliteratura y Gallego-Asturianu na ufierta educativa de los centros asturianos. Nesta llinia, el Gobiernu del Principáu d’Asturies asina lo desenvuelve nos Decretos Curriculares correspondientes a caúna de les etapes educatives afectaes pola LOMCE:
Decretu 82/2014, de 28 d’agostu, pol que se regula la ordenación y s’establez el currículu de la Educación Primaria nel Principáu d’Asturies.
Decretu 43/2015, de 10 de xunu, pol que se regula la ordenación y s’establez el currículu de la Educación Secundaria Obligatoria nel Principáu d’Asturies.
Decretu 42/2015, de 10 de xunu, pol que se regula la ordenación y s’establez el currículu del Bachilleratu nel Principáu d’Asturies.
La regulación específica de la Llingua Asturiana y Lliteratura y Gallego-Asturianu recueye l’Anexu III de caún de los Decretos mentaos referíos a les asignatures de llibre configuración autonómica.
-
Educación abre’l plazu pa inscribise na IX Sestaferia Educativa: «Creatividá y anovación nel enseñu de llingües»
-
La Conseyería d’Educación publica un númberu nuevu del boletín dixital Educallingua
-
Política Llingüística pon en marcha una campaña de matriculación en Llingua Asturiana y Gallego-Asturianu
-
La Conseyería d'Educación celebra un alcuentru virtual pa visibilizar la enseñanza d'asturianu