El miércoles 22 de marzu, a les 19:00 hores, preséntase nel aula escalonada «Severo Ochoa» del Edificiu Históricu de la Universidá d'Uviéu la obra La llingua n’Asturies al traviés de los sieglos, de Xulio Viejo. L'autor va tar acompañáu nel actu pola periodista y miembru d'honor de l'Academia de la Llingua Asturiana Pilar Rubiera. 

Esta monografía percuerre la historia del fechu llingüísticu n'Asturies de la prehistoria hasta los nuestros díes, y recueye los testos esplicativos que formaron parte de la esposición Voces. La llingua n’Asturies al traviés de los sieglos, puesta en marcha pola Dirección Xeneral de Política Llingüística nel 2018. El testu contién les claves históriques y la información básica relativa al patrimoniu llingüísticu asturiano, acompañáu de gran parte de los materiales gráficos que se recoyeron p'aquella esposición.

Xulio Viejo ye doctor en Filoloxía Románica y profesor titular de Filoloxía Española de la Universidá d'Uviéu. Amás, ye miembru del grupu d'investigación Seminariu de Filoloxía Asturiana y desenvuelve lo más de la so actividá docente y investigadora alredor de la llingua y la lliteratura asturiana.

Esta obra ye una coedición ente'l Principáu d'Asturies y Ediciones Trea, y ta disponible pa la so venta en llibreríes.